TIRANË– Ministrja e Shtetit për Marrëdhëniet me Parlamentin njëherazi drejtuese politike e Partisë Socialiste në Shkodër Elisa Spiropali ka reaguar për atentatin me eksploziv të kryer këtë martë ndaj kreut të Partisë Demokratike dega Vau i Dejës, Bernard Ndreca. Përmes një postimi në Facebook Spiropali shkruan se autoritet ligjzbatuese duhet të zbardhin urgjentisht ngjarjen e rëndë. Po ashtu nuk kanë munguar akuzat politike. Spiropali duke iu referuar akuzave të bëra nga kryedemokrati Sali Berisha, i cili pak orë më parë e cilësoi atentatin si politik shkruan se “Haxhiqamili” nuk priti fjalës ne drejtësiu. Po ashtu ajo ka hedhur akuza dhe ndaj kandidatit të opozitës për bashkinë e Vaut të Dejës, Zef Hila.
REAGIMI:
I kërkoj organeve ligjzbatuese të zbardhin urgjentisht aktin kriminal të vendosjes së tritolit në makinën e Z.Ndreca, në Vaun e Dejës. Përgjegjësit duhet të marrin dënimin e merituar. Ky është akti i dytë kriminal në pak muaj në këtë zonë, pas vendosjes së tritolit jashtë zyrave të OSHEE në Bushat. Është për të ardhur keq që haxhiqamilisti i Vaut të Dejës, Zef Hila, bashkë me atë të Foltores me qera te Partia e Lirisë, Sali Berisha, nuk presin rezultatet e hetimit, por lëshojnë akuza kriminale ndaj kundërshtarit për të rritur kapitalin politik që tashmë u ka shterrur. Janë të njëjtët njerëz që në 2019-ën në një akt barbar të pashembullt i vunë zjarrin shkollës në Bushat dhe dogjën materialet zgjedhore. Për veprimin e tyre kriminal Zef Hila u shkarkua nga kryetar bashkie dhe zjarrëvënësit e tjerë u arrestuan. Fatkeqësisht, drejtësi për aktin nuk u bë. Dosja u mbyll.
E inkurajoj policinë dhe prokurorinë të mos stepen nga sulmet politike, por të bëjnë detyrën deri në zbardhjen e hollësishme të aktit të sotëm dhe vendosjen para drejtësisë të përgjegjësve.
