Pas shumë muajsh thashethemesh dhe dyshimesh në rrjetet sociale, një nga çiftet më të përfolura të showbiz-it shqiptar, reperi i njohur Stresi (Arkimed Lushaj) dhe ish-partnerja e tij Kejsi, kanë konfirmuar zyrtarisht se janë bashkë sërish.
Ribashkimi u bë publik përmes një fotosesioni ekskluziv dhe një interviste për revistën “Who”, ku çifti u shfaq më i afërt se kurrë më parë, me buzëqeshje dhe përkushtim të dukshëm ndaj njëri-tjetrit. Kjo rikthesë e bujshme ka marrë vëmendjen e fansave.
Në një postim të ndarë në InstaStory, Stresi ka zgjedhur fjalë të sinqerta për të përshkruar emocionet që e kanë shoqëruar në këtë moment të veçantë:
“Gjithmonë kam menduar se nuk ka më shpresë kur dy njerëz që kanë qenë shumë të dashuruar ndahen dhe kalojnë vite pa u parë, por ndonjëherë mjafton një moment dhe gjithçka ndryshon. Respektojeni partnerin tuaj, duajeni me sinqeritet dhe mos e ulni kurrë, as gjatë lidhjes e as pas ndarjes. Lini gjithmonë një derë hapur… sepse kurrë nuk i dihet. Never say never.”
Në intervistën për revistën “Who”, Kejsi dhe Stresi treguan se kjo rikthesë nuk ka ndodhur papritur, por si rezultat i reflektimit personal, rritjes shpirtërore dhe një vetëdijeje më të thellë për ndjenjat që i lidhin. Ata pranuan se, pavarësisht viteve të kaluara larg njëri-tjetrit, asnjëherë nuk e kanë humbur respektin dhe dashurinë.
“Dashuria jonë nuk kishte mbaruar, kishte vetëm nevojë për kohë dhe për të dy që të rriteshim,” u shpreh Kejsi.
Reagimet e ndjekësve nuk kanë munguar, dhe shumica e tyre janë të gëzuar që çifti i dashur për publikun ka vendosur t’i japë edhe një mundësi dashurisë së tyre.
Ky ribashkim tregon se ndonjëherë, edhe kur gjithçka duket e mbyllur, zemra mund të gjejë rrugën për t’u rikthyer aty ku ndjen më shumë paqe.
