TIRANË– Blerta Mema një studente e mjekësisë me origjinë nga Prrenjasi që ishte e pranishme në takimin që kreu i qeverisë zhvilloi në Kryeministri me studentët ekselentë u bëri thirrje të rinjve që të mos “bëhen emigrantë”. Ajo tha se ishte vetë një nga shumë të rinjtë që kishin zgjedhur të largohen por që u rikthye sërish në vendin e saj pasi sipas Blerta Memës atje të “vidhen” ëndrrat.
Blerta Mema: Unë jam Blerta Mema, vij nga një fshat në bashkinë e Përrenjasit. Në vitin 2019 isha studente në vitin e parë në gazetari në një takim që ju zhvilluat (i drejtohet Ramës) më thatë “Puno fort se do t’ia dalësh”. Unë atëherë nuk ia dola. E gjendur mes shumë vështirësive zgjodha rrugën e emigrimit, emigrova në Greqi, në vitin 2020. Por emigrimi të merrte ëndrrat, të merrte pasionin. Kur isha fëmijë e dija se të jesh emigrant është një profesion, e dija se babi shkon në një vend të bukur ku merr para. Kur unë u bëra emigrante vendosa të kthehem. Qeshorin e 2020 u ktheva. Zgjodha një nga programet prioritare të studimit në Vlorë. Sot jam këtu dhe dua t’ju jap një mesazh të gjithë atyre të rinjve që e kanë gati një çantë për të ikur, mos u bëni emigrant. Këtë doja t’ju thoja, qëndroni këtu.
