Një studim i ri sugjeron që ChatGPT mund të sugjerojë diagnoza për pacientët, njësoj si një mjek.
Hulumtimi i publikuar në revistën Annals of Emergency Medicine zbuloi se chatboti i inteligjencës artificiale (AI) diagnostikonte pacientët si të ishte një mjek i trajnuar.
Studiuesit në spitalin Jeroen Bosch në Holandë futën shënimet e mjekëve dhe anonimizuan informacionin për 30 pacientë, duke përfshirë testet, simptomat dhe rezultatet laboratorike, në dy versione të ChatGPT.
“Ne zbuluam se ChatGPT performoi mirë në gjenerimin e një liste të diagnozave të mundshme duke sugjeruar opsionin më të mundshëm,” tha autori i studimit Dr. Hidde ten Berg.
Versioni 3.5 i ChatGPT sugjeroi diagnozën e saktë në 97% të rasteve. Megjithatë duhet theksuar se mjete të tilla nuk janë pajisje mjekësore dhe për momentin nuk mund të përdoren klinikisht.
Studimi do të prezantohet në Kongresin Europian të Mjekësisë Emergjente këtë fundjavë.
