52% e të rinjve janë të alarmuar për ndryshimet klimatike në Shqipëri, ndërsa 46% e fëmijëve të anketuar kanë njohuri të kufizuara për ndryshimet klimatike.
Gjetjet vijnë nga një studim i organizatës World Vision Albania me 332 fëmijë, adoleshentë dhe të rinj nga gjashtë rajone të vendit Shkodër, Dibër, Kurbin, Durrës, Tiranë, Korçë.
Studimi titullohet: “Kriza Klimatike: Perceptimet e Fëmijëve dhe të Rinjve mbi Ndryshimet Klimatike dhe Transformimin Mjedisor në Shqipëri”.
Paneli Ndërqeveritar për Ndryshimet Klimatike ka paralajmëruar se rritja e temperaturës mbi 1.5°C deri në 2040 do të sjellë pasoja të mëdha sociale dhe mjedisore. Mosnjohja e duhur e kësaj çështjeje është problem i rëndësishëm. Nga ana tjetër, mendimi i fëmijëve, adoleshentëve dhe të rinjve në Shqipëri për ndryshimet klimatike ka vlerë për t’u dëgjuar.
Studimi synon të nxjerrë në pah se si fëmijët dhe të rinjtë artikulojnë njohuritë lidhur me klimën dhe mjedisin, nivelin e tyre të shqetësimit për ndryshimet klimatike, nivelin e të kuptuarit mbi pasojat në jetën e tyre dhe nivelin e gatishmërisë për veprim në rast fatkeqësish që lidhen me ndryshimet klimatike.
Mungesa e njohurisë e për pasojë e vetëdijësimit rrezikon të mos reflektohet në sjellje dhe qëndrime të cilat adresojnë çështjet e ndryshimeve klimatike tani e në të ardhmen.
Ndërkohë sa më pak të dimë për krizën klimatike, aq më shumë problemi do të thellohet dhe pasojat do të thellojnë pabarazitë shoqërore, do të ndikojnë në jetën e fëmijëve dhe të rinjve, duke shtuar rreziqet në shëndet, arsimim, e mirëqenie ekonomike, si dhe duke kërcënuar arritjen e rezultateve afatgjata të zhvillimit të qëndrueshëm. Ndaj është e rëndësishme që të marrim hapa dhe veprime konkrete, duke përfshirë edhe fëmijët e të rinjtë për të parandaluar efektet negative.
