EGJIPT- Ushtria izraelite njofton se tre nga ushtarët e saj dhe një polic egjiptian u vranë në shkëmbim të zjarrit përgjatë kufirit jugor me Egjiptin. Mediat e huaja raportojnë se, dy ushtarë, përfshirë një femër, u vranë herët në mëngjes dhe një i tretë gjatë një gjuetie për sulmuesit në zonën e Brigadës Rajonale të Paranit.
Një nënoficer izraelit mbeti gjithashtu i plagosur. Një zëdhënës i forcave të armatosura të Egjiptit tha se një polic “ka thyer” barrierën e sigurisë kufitare ndërsa ishte në ndjekje të kontrabandistëve të drogës, duke çuar në vdekjen e tre ushtarëve izraelitë dhe plagosjen e dy të tjerëve. Polici u vra nga shkëmbimi i zjarrit.
