TIRANË– Ministrja e Ekonomisë dhe Financave Delina Ibrahimaj foli gjatë konferencës së sotme për mediat për sulmin kibernetik të ndodhur disa ditë më parë ndaj një banke të nivelit të dytë në vendin tonë. Ibrahimaj u shpreh se asnjë llogari nuk është prekur dhe shtoi se qeveria është duke ndërtuar infrastrukturën që do të monitorojë sulmet që do vijnë në të ardhmen. Sipas saj sulme të tilla ndodhin në të gjithë botën.
Delina Ibrahimaj: Ka pasur njoftime që sektori bankar është sulmuar nga atake kibernetike. Ju siguroj që ka në muaj mbi 1 mln sulme të cilat janë sulme të përditshme në sektorin privat apo publik. Tani është një luftë e prekshme që prek çdo sektor publik apo privat. Banka në fjalë ka bërë komunikimet e saj dhe nuk ka pasur prekje të llogarive të individëve. Sektori bankar ka marrë masa që herët sa i përket sulmeve kibernetike. Qeveria është duke ndërtuar infrastrukturën që do monitorojë sulmet që do vijnë në të ardhmen. Është një dukuri që nuk ndodh vetëm në vend. Ndodh në të gjitha vendet e botës sepse kjo është një lloj lufte e re e një ere të re
