Ditën e djeshme në fshatin Bansjka të komunës së Leposaviqit ndodhi një përleshje e armatosur ku grupi i armatosur u barrikadua brenda një manastiri të fshatit, i cili më vonë gjatë ditës u vu nën kontrollin e policisë. Si pasojë e sulmit mbeti i vrarë një polic dhe një tjetër u plagos.
Policia e Kosovës bëri të ditur se janë vrarë tre sulmues dhe gjashtë të tjerë janë arrestuar nga grupi prej rreth 30 personave të armatosur.
Xhelal Sveçla, Ministri i Brendshëm tha se policia pasi mori nën kontroll zonën ku ndodheshin terroristët, zbuloi një sasi të jashtëzakonshme armatimesh të rënda.
Vrasja e policit të Kosovës nga një grup i armatosur në veri, e dënua në shkallë të gjerë.
Presidentja e Kosovës Vjosa Osmani ndërpreu të gjitha takimet në Nju Jork dhe u nis për në Kosovë. Edhe ambasadori amerikan në Prishtinë, Jeff Hovenier dënoi ashpër sulmet e orkestruara ndaj policisë së Kosovës.
Ja çfarë thuhet në deklaratën e SHBA-së:
“Ne po e vëzhgojmë situatën nga afër dhe i dënojmë këto akte të dhunshme ndaj autoriteteve legjitime të Republikës së Kosovës. Autorët duhet dhe do të mbajnë përgjegjësi dhe do të dalin para drejtësisë. Ata duhet të ndërpresin menjëherë sulmet e tyre”.
Kryeministri shqiptar Edi Rama, tha se “tragjedia e humbjes së jetës së efektivit të Policisë së Kosovës është këmbana më e madhe e alarmit deri më sot për rrezikun e vazhdueshëm të eskalimit të krizës së zgjatur në një konflikt të armatosur”
