Ermal Jauri, ekspert i sigurisë nga Qendra “Marshall” flet për ngjarjen e rëndë që tronditi Kosovën dhe mbarë opinionin ndërkombëtar, që shkaktoi sulmi terrorist në veri të Kosovës.
“Në këndvështrimin tim është përdorur situata që është delikate dhe gjithë trazirat që kanë ndodhur gjatë kësaj periudhe në Veri të Kosovës, e cila ka shërbyer si rrjetë maskimi për të penetruar këto mjete apo këto pajisje luftarake deri në këtë pikë grumbullimi.
Ajo që është shqetësuese është armatimi i përdorur, pasi nuk kemi të bëjmë me një armatim të këmbësorisë së lehtë, por kemi të bëjmë me një armatim të rëndë dhe pjesë të armatimit të forcave speciale.
Mjetet e tjera kanë shfrytëzuar pikëkalimet që nuk kanë pasur kontrolle të Policisë së Kosovës dhe këto kanë ardhur pas tërheqjes së Policisë sipas marrëveshjes së fundit dhe këto mjete janë futur në territor.
Mjeti i modifikuar, është modifikuar në pikën e grumbullimit dhe ai lëvizte në territorin e Kosovës pa u pikasur nga autoritetet.
Duke marrë parasysh sasinë e armatimit, në gjykimin tim kemi të bëjmë me një trupë të mirëfilltë ushtarake, jo paraushtarake, edhe pose do të mohohen nga Serbia, të cilët janë futur në territorin e Kosovës.
Ajo që ëhstë shqetësuese është armatimi i rëndë dhe me rreze të gjerë veprimi, dhe janë gjetur edhe mini me aparatura kundër personelit të cilat janë ndaluar me konventë, të cilët janë futur ndër armët të eliminimit në masë.
Dhe kjo e bën akoma më të rëndë ngjarjen. Pra, duhet kuptuar a kemi të bëjmë me një qëllim që synon një grusht shteti, të cilën nuk e hedh poshtë si hipotezë.
Sepse drejtuesi i parë i këtij grupi ishte drejtues i Listës Serbe dhe kjo tezë mbetet në tavolinë. Së dyti lindin disa pyetje rreth kësaj: a do të shpërndaheshin këto armë në popullsinë serbe, me qëllimin e ndezjes së një proteste, apo konflikti rastësor i cili përfundon me gjakderdhje dhe në fund do të fajësoheshin autoritetet e Kosovës?!
A do të merreshin peng anëtarët e Kishës në të cilën ishin grupuar këto armë dhe do të fajësoheshin prapë autoritetet e Kosovës?! A ka pika të tjera në territorin e Kosovës të cilat janë të ngjashme me ato që u kapën?! Pra ka një sërë pyetjesh të cilat nuk gjejnë dot përgjigje tani”, u shpreh ndër të tjera eksperti Jauri.
/ Newszone
