TIRANË– Prezenca e OSBE-së në Tiranë dhe Delegacioni i Bashkimit Europian kanë reaguar pas sulmin të përgjakshëm me armë zjarri në zyrat e Top Channel ku mbeti i vrarë roja i sigurisë Pal Kola. Në reagimin e tyre ata shprehen se dënojnë me forcë sulmin ndaj një media të cilin e kanë cilësuar si një sulm ndaj demokracisë. OSBE dhe BE bëjnë thirrje që ngjarja e rëndë të zbardhet sa më shpejt dhe autorët të dalin para drejtësisë.
Reagimi i OSBE, Tiranë: Dënojmë me forcë sulmin kriminal kundër Top Channel-it dhe shprehim tronditjen dhe ngushëllimet tona të ndjera për familjen dhe kolegët e punonjësit të sigurisë, z. Pal Kola, i cili humbi jetën në krye të detyrës, ndërsa ruante ndërtesën ku bëhet gazetari që i shërben informimit publik. Një sulm i tillë flagrant kundër medias është sulm flagrant kundër demokracisë. Prezenca e OSBE-së u bashkohet thirrjeve të zyrtarëve më të lartë të shtetit për një hetim të shpejtë e të plotë të incidentit dhe pret që autorët dhe motivet e plota të këtij sulmi të identifikohen dhe të vihen para drejtësisë
Reagimi i delegacionit të BE, Tiranë: ‘Delegacioni i BE-së në Shqipëri dënon sulmin me armë zjarri në mjediset e Top Channel dhe i shpreh ngushëllimet e thella familjes dhe kolegëve të Pal Kolës, rojes së sigurisë që mbeti i vrarë në sulm. U bëjmë thirrje autoriteteve shqiptare të kryejnë një hetim të shpejtë dhe të plotë dhe të nxjerrin përgjegjësit para drejtësisë. Sundimi i ligjit dhe liria e medias janë dy vlera themelore të shoqërive demokratike që duhet të respektohen.
