TIRANË– Ish-kryetari i Partisë Demokratike Lulzim Basha duket se ditën e sotme ka lënë pas të shkuarën dhe ka reaguar në lidhje me sulmin e kryer ndaj kryedemokratit Sali Berisha. Në një postim në Twitter Basha shkruan se dënon sulmin fizik ndaj Berishës dhe u bën thirrje autoriteteve të hetojnë. Sipas Bashës dhuna nuk është kurrë zgjidhje.
“Dënoj ashpërsisht sulmin fizik ndaj z. Berisha. Kjo ngjarje duhet të hetohet dhe të zbardhet plotësisht. Dhuna nuk mund të jetë kurrë zgjidhje. Ajo është vetëm tregues i një vendi pa zgjedhje të lira, pa drejtësi, pa demokraci funksionale dhe me korrupsion të pandëshkuar”, shkruan Basha.
Kryetari i Partisë Demokratike Sali Berisha u godit me grusht në fytyrë nga 31-vjeçari Gentian Shehu gjatë kohës që po marshonte nga selia e PD drejt bulevardit ‘Dëshmorët e Kombit’ ku do bashkohej me protestuesit. Shehu ka ardhur në mënyrë të rrufeshme nga turma dhe goditi në fytyrë Berishën. Në këtë moment kreu i PD ka rënë në tokë ndërsa ai është neutralizuar nga trupërojat.
