TIRANË– Gerti Shehu 31-vjeçari që qëlloi me grusht në fytyrë kreun e Partisë Demokratike Sali Berisha më datë 6 dhjetor teksa ky i fundit po marshonte në protestë mësohet të ketë kërkuar që truprojat e kryedemokratit të mos ndiqen penalisht për dhunën e ushtruar ndaj tij pasi ai goditi kreun e PD.
Ata rrezikonin të merreshin nën hetim për plagosje të lehtë me dashje ose dëmtime të tjera me dashje, pasi 31-vjeçari ende ndodhet në spitalin e Traumës për shkak të goditjeve të marra. Por Shehu duket se ka vendosur që të mos i kallëzojë penalisht.
Gerti Shehu goditi me grusht kreun e Partisë Demokratike Sali Berisha më protestën e 6 dhjetorit. Ai u fut mes turmës dhe në një moment u afrua me shpejtësi dhe godtit Berishën. Si pasojë e sulmit kryedemokrati ra përtokë dhe u ngrit i gjakosur në fytyrë dhe me sy të nxirë. Shehu u neutralizua nga truprojat dhe protestuesit në shesh. Më pas ai u arrestua nga Policia. Sipas Policisë ai është person me skedë të pasur kriminale pasi është akuzuar më parë për plagosje, prishje të qetësisë publike dhe trafikim të lëndëve narkotike. Atij iu komunikua masa e arrestit me burg ditën e sotme në Spitalin e Traumës ku ndodhet për të marrë mjekim pasi pas incidentit u dhunua nga protestuesit.
