VATIKAN– Presidenti i Republikës Bajram Begaj ndodhet në Vatikan ku po zhvillon një vizitrë zyretare. Ai u prit në takim nga Ati i Shenjtë Papa Françesku dhe Sekretari i Shtetit të Vatikanit. Gjatë qëndrimit atje Kreu i Shtetit ka dhënë dhe një intervistë për mediat italiane ku ka folur për vizitën si dhe detajet nga takimi i tij me Papën. Begaj shprehet se i ka kërkuar Kreut të Selisë së Shenjtë që Vatikani ta njohë Koosvën si shtet të Pavarur. Sipas tij, kjo do të ndihmonte akoma më shumë përpjekjet për dialogun mes Kosovës e Serbisë.
“Eksperienca jonë ballkanike na mëson që nuk mund të luhet lojë luftrash në rajonin me të kaluar dhe të sotme problematike. Për këtë arsye duhet dialog i vazhdueshëm, prosperitet ekonomik, energji pozitive për qytetarët tanë, por mbi të gjitha një projeksion i mirëfilltë Evropian për të ardhmen tonë. Zgjerimi i BE-së në Ballkan nuk ka pse të përballet me Europskepticizmin e brendshëm të disa forcave politike të BE-së, por duhet të jetë e vetmja rrugë për ta bërë të gjithë Ballkanin pjesë të BE-së larg influencës së fuqive të treta në rritje. Gjithashtu, roli i Papës dhe i Selisë së Shenjtë është shumë i rëndësishëm për të shtuar vëmendjen e BE-së dhe të Perëndimit, jo vetëm për të ruajtur paqen në Rajonin e Ballkanit, por edhe për të siguruar të ardhmen Evropiane të Ballkanit. Në këtë pikëvështrim sigurisht i kërkova Papa Françeskut që Vatikani të njohë Kosovën si shtet, pasi kjo njohje do të ndihmonte akoma më shumë përpjekjet për dialog Beograd-Prishtinë që po udhëhiqen sot nga Bashkimi Evropian dhe Shtetet e Bashkuara të Amerikës”, tha Begaj.
