SARANDË– Një 28-vjeçar është vënë këtë të dielë në prangat e Policisë së Sarandës pai duke drejtuar automjetin në gjendje të dehur u përfshi në një aksident. I riu humbi kontrollin e mjetit duke përplasur dy makina që ishin të parkuara. Fatmirësisht u regjistruan vetëm dëme materiale. Ndërsa një 61-vjeçar i identifikuar me inicialet Sh.C u arrestua pasi ka tentuar të vjedhë banesën e një gruaje. Ndërkohë një 31-vjeçar i identifikuar me inicialet E.H u vu nën hetim pasi dyshohet se ka trafikuar një automjet tip “Audi” që rezulton i vjedhur në Belgjikë.
NJOFTIMI I POLICISË:
Specialistët e Qarkullimit Rrugor të Komisariatit të Policisë Sarandë arrestuan në flagrancë shtetasin A. G., 28 vjeç, pasi duke drejtuar automjetin, në gjendje të dehur, ka përplasur disa automjete të parkuara dhe ka shkaktuar dëme materiale.
Po ashtu, specialistët për Hetimin e Krimeve të Komisariatit të Policisë Sarandë arrestuan shtetasin Sh. C., 61 vjeç, banues në Kot, pasi ka tentuar të vjedhë në banesën e një shtetaseje, në Karahaxh, Sarandë.
Specialistët për Hetimin e Krimeve të Komisariatit të Policisë Sarandë referuan materiale në Prokurori ku nisi procedimi në gjëndje të lirë për shtetaset A. A., 39 vjeçe, banuese në Gjirokastër dhe E. L., 33 vjeçe, banuese në Sarandë, pasi janë konstatuar duke shfrytëzuar për të lypur, 4 fëmijët e tyre të mitur 4-9 vjeç.
Specialistët për Hetimin e Trafiqeve dhe Narkotikëve referuan materialet në Prokurori ku nisi procedimi në gjëndje të lirë për shtetasin E. H., 31 vjeç, banues në Vlorë, pasi dyshohet se ka trafikuar një automjet tip “Audi” që rezulton i vjedhur në Belgjikë. Materialet procedurale i kaluan Prokurorisë, për veprime të mëtejshme.
