Sipas BBC, iPhone i ri i Apple kur të prezantohet nga mesi i këtij muaji do të ketë një portë për fisha USB-C. Aktualisht, përdoruesit e celularëve të kësaj kompanie përdorin përshtatësin Lightning, ndryshe nga rivalët si Samsung. Një ligj i Bashkimit Evropian kërkon që prodhuesit e celularëve të miratojnë një portë të përbashkët karikimi brenda dhjetorit të vitit me qëllimin të kursehen paratë e konsumatorëve dhe të ulet niveli i mbetjeve. Shumica e produkteve të reja të Apple, si iPad-ët e fundit e përdorin tashmë USB-C, por kompania kishte ngritur zërin kundër rregullave të BE-së. Kur ligji u prezantua në shtator 2021, një përfaqësues i Apple deklaroi:
“Rregullorja e rreptë që detyron vetëm një lloj karikuesi i zë frymën inovacionit në vend që ta inkurajojë atë, e kjo nga ana tjetër do të dëmtojë konsumatorët në Evropë dhe në mbarë botën”.
Duke qenë se iPhone 14 tani duket të jetë pajisja e fundit e Apple që e përdor ekskluzivisht Lightning, kjo mund të shënojë fillimin e fundit të këtij përshtatësi.
