Lëvizja surprizë e Gazment Bardhit i ka gjetur të papërgatitur dy grupimet në PD, Foltoren e Sali Berishës dhe PD-në zyrtare të Lulzim Bashës.
Këtë të diel, kryetari i Grupit Parlamentar të PD ka njoftuar deputetët e PD se ditën e martë në orën 12.00, do të zhvillohet mbledhja e grupit parlamentar në hotel Tirana, ku ftohen të gjithë deputetët, pa përjashtim.
“Në cilësinë e Kryetarit të Grupit Parlamentar të PD, në nisje të këtij sesioni parlamentar, do të ndërmarr nismën për thirrjen ditën e martë, datë 5 Shtator 2023, të një mbledhje të përbashkët të të gjithë deputetëve të koalicionit “PD-AN”, pa asnjë përjashtim”, thuhet në njoftimin që Bardhi u ka dërguar deputetëve të grupit parlamentar.
Fakti që Bardhi fton të gjithë deputetët ngre disa pikëpyetje.
Së pari, Sali Berisha është përjashtuar nga Lulzim Basha me vendim të datës 9 shtator 2021. Ndërsa statuti i Kuvendit të 18 dhjetorit 2021 ka të sanksionuar përjashtimin nga PD të kujtdo që është shpallur non grata nga Shtetet e Bashkuara të Amerikës. Ky statut është në fuqi. Mirëpo sipas këtij neni të statutit, pjesëmarrja e Sali Berishës në mbledhjen e grupit parlamentar të thirrur nga Gazment Bardhi është i pamundur.
Sakaq, pas protestës së 8 janarit te selia e PD, janë përjashtuar gjithashtu edhe deputetët Flamur Noka, Albana Vokshi, Edmond Spaho.
Por një nga ndryshimet që miratoi Kuvendi i djeshëm i PD ishte edhe përjashtimi i atyre që kandiduan për Partinë e Lirisë dhe koalicionin Berisha-Meta në zgjedhjet vendore të 14 Majit.
Së dyti, Kuvendi i Sali Berishës i 11 Dhjetorit 2021 ka bërë disa ndryshime në statut. Sipas vendimeve të këtij statuti, Gazment Bardhi është shkarkuar nga funksioni i Sekretarit të Përgjithshëm. Foltorja ka zgjedhur Flamur Nokën në vend të Bardhit. Po ashtu, sipas statutit të Berishës, Gazment Bardhi nuk njihet as si kryetar i grupit parlamentar demokrat, pasi Rithemelimi ka zgjedhur Luçiano Boçin në këtë funksion.
Së treti, sipas statutit të ri të PD-së zyrtare, i miratuar një ditë më parë nga Kuvendi Kombëtar, Gazment Bardhi nuk është më kryetar i grupit parlamentar, post të cilin e ka marrë Lulzim Basha. Ndërkohë ai mban funksionin e Sekretarit të Përgjithshëm, por pa të drejtë ushtrimi kompetencash, pasi vula i ka kaluar Sekretarit të Çështjeve Ligjore, Endrit Sefa.
Kjo lëvizje e Gazment Bardhit mes shumë të panjohurash pritet të na jap një panoramë të qartë në vijim se çfarë do të ndodhë, por duhet theksuar se PD shkon kështu drejt një tjetër spiraleje dhe paqartësie për të ardhmen.
Mbetet për t’u parë nëse Bardhi dhe deputetët e tij mbështetës do të kalojnë zyrtarisht në krahun e “Foltores” duke pranuar kushtet e Berishës, apo grupimi i ri që ai pretendon të ngrejë do të jetë përtej Rithemelimit dhe PD-së zyrtare, pra pa Berishën dhe Bashën, të dy këta të shigjetuar gjithnjë nga deputetët e pavendosur si shkaktarët e krizës 2-vjeçare të Partisë Demokratike.
Deklarata e Gazment Bardhit
Gjatë gjithë kësaj kohe dhe veçanërisht në këtë periudhë të thellimit të keqqeverisjes, kam analizuar me përgjegjësi maksimale situatën në vend dhe nevojën që ka Shqipëria për një opozitë të fortë, të unifikuar dhe plotësisht funksionale.
Opozita shqiptare ka përballë një qeverisje të korruptuar dhe të lidhur me krimin e organizuar, që ka minuar zgjedhjet e lira dhe të ndershme, përmes metodave të kundërligjshme. Për këtë shkak, interesi publik dhe mbrojtja e interesit të qytetarëve, kërkon që çdo opozitar të përqëndrojë energjitë e tij vetëm në përballjen me regjimin e Edi Ramës.
Për fat të keq, kjo nuk ka ndodhur në këto 2 vitet e fundit. Lufta e brendshme në Partinë Demokratike e ka dobësuar opozitën dhe shpesh e ka shfokusuar nga misioni i saj, duke i krijuar një komoditet të pashoq e tërësisht të pamerituar Edi Ramës në mandatin e tij të 3 radhazi, ku sundon keqqeverisja, arroganca dhe korrupsioni. Kjo situatë dikton nevojën që, në mënyrë urgjente, secili prej nesh, deputetëve të opozitës, të tejkalojë vetveten për të ofruar dhe për të gjetur zgjidhje në interes të përbashkët të të gjithë opozitarëve dhe çdo qytetari që kërkon ndryshimin e qeverisjes.
Ndasitë në mendime dhe qëndrime për çështje të ndryshme brenda Partisë Demokratike nuk duhet të na shfokusojnë nga përgjegjësia që kemi ndaj vendit dhe qytetarëve. Kam bindjen e plotë se çështjet që na bëjnë bashkë janë më shumë se çështjet që na ndajnë.
Duke ruajtur dhe respektuar qëndrimin apo mendimet individuale të çdo deputeti për zhvillimet apo debatin e brendshëm në Partinë Demokratike dhe në kampin opozitar, ndaj bindjen me shumicën e kolegëve që kjo nuk duhet të na pengojë për t’u bashkuar dhe për të unifikuar qëndrimin dhe aksionin opozitar kundër keqqeverisjes së Edi Ramës.
Për këtë arsye, në cilësinë e Kryetarit të Grupit Parlamentar të PD, në nisje të këtij sesioni parlamentar, do të ndërmarr nismën për thirrjen ditën e martë, datë 5 Shtator 2023, të një mbledhje të përbashkët të të gjithë deputetëve të koalicionit “PD-AN”, pa asnjë përjashtim. Duke besuar se shqetësimi për nevojën urgjente të unifikimit të opozitës bashkëndahet nga çdo deputet që ndien përgjegjësinë për një përballje të unifikuar kundër Edi Ramës, mirëpres pranimin e kësaj thirrje të sinqertë, me qëllimin e mirë të përcaktimit të axhendës dhe strategjisë së përbashkët të të gjithë PD dhe të gjithë opozitës parlamentare.
/ Newszone
