Studentët e arteve për tre ditë më radhë ndoqën “Të jesh artist në shekullin XXI”, një materclass nga Melisa Zaganjori, një pianiste dhe profesore në Spanjë. Një mundësi për muzikantët që të pajisen me aftësitë e nevojshme për një treg global për koncerte dhe shfaqje. Në bashkëpunim me Ambasadën e Spanjës, ky aktivitet u zhvillua në Universitetin e Arteve në datat 16, 17 dhe 18 maj. Më herët Zaganjori u shpreh se ky workshop iu është drejtuar studentëve të arsimit të lartë dhe të mesëm për t’ju dhënë njohuritë e nevojshme për të pasur një karrierë të qëndrueshme në art. “Një nga objektivat e këtij projekti është qasja dhe hapja e mundësive të artistëve të rinj për të njohur rrugët e reja rreth si ata të kenë një karrierë muzikore dhe të kenë mundësi dhe të bëhen pjese e tregut të punës muzikor ndërkombëtar”, shprehet ajo. Me një aktivitet që e zhvillon larg Shqipërisë, pianistja Melisa Zaganjori për tre ditë zhvilloi këtë masterclass me studentët me në fokus edukimi, tregu i punës artistik dhe mundësitë e punësimit. Zaganjori me profesionalizmin e saj tërhoqi vëmendjen e studenteve të Universitetit të Arteve, por siç shprehej dhe vetë më herët ajo është investim në karrierën e tyre. “Ky masterclass është një investim në karrierën profesionale të artistëve, pasi do ti lejojë ata të marrin mjete dhe njohuri që do ti ndihmojnë ata të zhvillojnë një karrierë të qëndrueshme dhe të dalin në një treg konkurrues. Përveç kësaj, duke qenë se është trajnim i specializuar në muzikën klasike, studentët do të mund të përfitojnë nga një njohuri më e thellë dhe më specifike në fushën e tyre”, thotë Zaganjori.
Karriera ndërkombëtare
Melisa Zaganjori ka lindur në Shqipëri, por prej 10 vitesh zhvillon aktivitetin e saj artistik në Spanjë. Zaganjori i është përkushtuar muzikës profesionalisht për më shumë se 20 vjet. Filloi studimet e saj në Liceun Artistik “Jordan Misja” me Vladimir Kapon. Që në fëmijëri ka marrë pjesë në konkurse ndërkombëtare, duke qenë fituese e disa çmimeve dhe pjesëmarrëse ne programe të ndryshme. Zaganjori falë vendosmërisë së saj për të vazhduar në Europë, u bë shkak për tu shpërngulur në shtetin spanjoll. Ka përfunduar studimet e larta në Konservatorin Katarina Gurska në Madrid. Duke vazhduar formimin me profesorë si Yuri Ananiev, Nino Kereselidze, Naum Grubert, Elisso Virsaladze. Me një karrierë ndërkombëtare si pianiste në Itali, Çeki, Austri, Portugali ka qenë pjesë e festivaleve të rëndësishme si Ameropa Festival, Mozarteum Summer Festival, Klassikfest ndër të tjera. Nga ana tjetër, Melisa zhvillon anën e saj filantropike duke zhvilluar aktivitete për fëmijët në situata të paqëndrueshme, gratë e dhunuara, personat me aftësi ndryshe me institucione të ndryshme si Caritas, Cruz Roja, Acción Social por la Música duke vënë muzikën në dobi të shoqërisë. Një pjesë e rëndësishme e karrierës së saj është përmirësimi i cilësisë së arsimimit për muzikantët e rinj, si rrjedhojë, duke vazhduar formimin e saj për Administrim Kulturor në Universitetin Carlos III dhe për Sipërmarrje në Universitetin Deusto, Madrid. Prej vitesh, udhëheq ligjërata për përmirësimin e punësimit të artistëve, në mënyrë që ata të rrisin aftësitë e tyre dhe të mund të aplikojnë projekte të krijimit artistik sipas nevojave aktuale në industrinë kulturore.
