LUSHNJE– Një ngjarje e rëndë është regjistruar këtë të enjte në fshatin Ballagat të Lushnjes Raportohet se një 62-vjeçare e identifikuar si B.Hasalla ka mbetur e plagosur pas disa të shtënave me armë zjarri. Ajo është dërguar menjëherë në spital dhe ndodhet nën kujdesin e bluzave të bardha. Policia bën me dije se janë ngritur pika kontrolli në të gjitha hyrje daljet e Lushnjës me qëllim kapjen e autorit/ve.
E plagosura është e motra e Kastriot Hasallës, i cili në vitin 2019 së bashku me vëllanë e tij kanë vrarë për një konflikt pronësie kushëririn e tyre , Romeo Hasallën. E gjitha nisi nga shkulja e ullinjve që familja e Shaipit kishte mbjellë në tokat që Kastrioti pretendonte se e kishte të vetën. Sapo ka filluar t’i shkulë me zetor kanë qenë Romeo me vëllezërit e tij që janë përleshur me djalin e Kastriotit dhe vëllain. Të gjendur në këto kushte Kastrioti ka nxjerrë armën e gjahut të cilën e kishte në zetor dhe ka qëlluar në drejtim të Romeos, i cili humbi jetën, ndërsa babai dhe vëllezërit u plagosen lehtë. Pas ngjarjes policia arrestoi vëllanë e Kastriotit dhe djalin, ndërsa vetë Kastrioti u vetëdorezua tre ditë më pas.
NJOFTIMI I POLICISË:
Rreth orës 17:20, në fshatin Ballagat, Lushnjë, në rrethana ende të paqarta është plagosur me armë zjarri shtetasja B. S., 60 vjeçe, banuese në Ballagat, Lushnjë, e cila ndodhet në spital, në kujdesin e mjekëve. Shërbimet e Policisë kanë shkuar menjëherë në vendngjarje , janë ngritur pika kontrolli në të gjitha hyrje-daljet e qytetit të Lushnjës dhe vijon krehja e zonës me qëllim kapjen e autorëve. Grupi hetimor ndodhet në vendngjarje dhe vijon punën intensive për zbardhjen e plotë të ngjarjes.
