TIRANË– Dorian Teliti, këshilltar për ekonominë në Partinë Demokratike është shfaqur këtë të diel në një prizëm ndryshe në emisionin “Stay Tunned” me moderatoren Valbona Mhilli në MCN Tv ku ka bërë një rrëfim për jetën e tij.
I ndalur në disa etapa të jetës së tij, Teliti rrëfeu se ka pasur një adoleshencë të mbarë, ka studiuar në Itali të cilën nuk e njeh pasi ka qenë i fokusur në studimet dhe punën e tij.
Ai tregoi se është njohur me gruan e tij në korridoret e ministrisë së Financave dhe se në shtëpi kontribuojnë të dy për të gjitha punët që duhet kryer.
“Jetojmë në kohë dinamike përsa i përket politikës dhe shoqërisë. Kemi më shumë se 1 vit me diskutime e brendshme. Ka qenë vit dinamik shpresoj që gjërat të përmirësohen. Objektivi ynë është të bërit opozitë kundrejt mazhorancës për të ndarë këndvështrimet tona për qytetarët për alternativën më të mirë. Janë shqiptarët që do vendosin. Kemi kërkuar që çdokush të ketë lirinë e të shprehurit dhe të zgjedhjes që Shqipërinë tonë ta çojmë përpara. Në Shqipëri nuk është se nuk janë bërë gjëra gjatë 30 viteve, apo në këto 9 vite, por shumë gjëra kanë mbetur pa bërë ose janë bërë keq. Jetojmë në kohë të vështira, ekonomia po vuan, qytetarët po largohen. Fakti që jemi në 2023 dhe kriza që na ka kapur dhe si pasojë e luftës në Ukrainë, përballja që i ka bërë qeveria kësaj krize nuk ka qenë e duhura. Mjafton të bëjmë atë që bëjnë vendet e tjera. Mund të shohim Kosovën, mbështeti ekonominë, biznesin dhe konsumatorin 6 herë më fuqishëm se qeveria jonë. Për inceneratorët, tenderat pa garë, për sipërmarrësit që marrin favorizime këtë punë qeveria po e bën mirë. Qeveria nuk po e bën si duhet punën për arsimin, biznesin dhe konsumatorët. Çmimet e larta po gërryejnë xhepin e tyre. Fuqia konsumatore ka rënë, mirëqenia e rrënuar është bërë më e mjeruar. Të kopjojmë çfarë kanë bërë vendet e tjera”.
“Jam brezi i dytë në politikë. Që në ’90 babi im ka mbuluar një pozicion të lartë gjatë qeverisjes së PD. Fëmijërinë time e kam kaluar në sistemin komunist, nuk kam fort kujtime të mira edhe pse s’kam qenë i persekutuar. Me ndryshimin e sistemit, aderimi i familjes ka qenë me PD. Babai ka mbajtur një funksion. Në 1999 kam ikur me studime, kur u ktheva në 2005 kisha dëshirë të rikthehesha. Nga 2007 kam pasur karrierë të plotë, i kam mbuluar të gjitha funksionet në strukturat e PD-së. I kam marrë hapat një nga një në PD. Ndokush mund të dojë të bentë 2-3 hapa. Për këtë gjë jam krenar”.
“Doriani adoleshent ka qenë djalë i mirë. Kam pasur adoleshencë të qetë, jam rritur në Tiranën e Re. Kam fat që kam dy prindër që më kanë dhënë mundësinë të arsimohen, prindërit e mi janë arsimtarë dhe këtu shkon në gen dëshira për tu arsimuar. Në 1999 kur vendosa të iki jashtë, ka qenë vendimmarrje dhe familjare. Kam zgjedhur Universitetin që ishte afër familjarëve të mirë që më ndihmuan në javët e para, më akomoduan. Kam pasur mundësi dhe të përfitoja dhe nga bursat. Kam pasur fatin për të mbajtur veten, dhe duke e gërshetuar me punët që bëja. Jam krenar për arsimimin tim dhe vazhdoj të investoj në arsimin tim. Mendoj që pas 30 vitesh kur të vijë pensionin nuk ka më mirë që të jesh përfaqësues i botës akademike dhe të kesh një karrierë të pasur. Politika është me breza, do të vijnë breza të rinj dhe ne do duhet të hapin krahun politik. Karriera akademike është cikël që nuk mbaron kurrë. Kam vendosur të kem gërshetim akademik dhe politik”.
“Jam i dashuruar pas vajzave të mia të vogla. Kam fatin të kem dy vajza, 6 dhe 3 vjeç. Sa të lodhin aq janë dashuri më vete. Është diçka që nuk mund ta përshkruash. Sidomos që tani janë dhe të vogla. 2-3 orë të ditës mundohem t’i kaloj me to. Kur vajzat ishin më të vogla angazhimet e mia ishin më të mëdha dhe shpesh herë kam lënë pas dore dhe familjen time. Sot kam arritur të optimizoj kohën dhe t’i përgjigjem kërkesave. Çdo gjë rrotullohet rreth vajzave të mia. Vajza e madhe ndonjëherë thoshte pse e ngre zërin, ose thoshte pse nuk flet pasi nuk kuptonte thelbin e bisedës. Por nuk ka kënaqësi më të madhe kur merr foto që shprehin vëmendjen që ka fëmija kur je në media që shohin ekrane”.
“ Nuk kam qenë ndonjëherë imcak, kam qenë djali i mirë që mësonte dhe prindërit ishin kërkues. Kam qenë adoleshenti që ka filluar punë në vitin e tretë në gjimnaz se ka qenë dhe insistimi i prindërve. Ka qenë eksperiencë e bukur dhe më dha një eksperiencë për të ardhmen. Ndonëse kam studiuar në Itali nuk e njoh vendin. Jam student i Italisë që nuk kam parë Romën, Firencës. Kam jetuar vite atje, por isha i fokusuar në punët e mia. Më pëlqejnë udhëtimet, por nuk jam partizan që të eci shumë të bëj udhëtime në mal. Jam më tepër drejt gjësë komode”.
“Njohja jonë ka ndodhur në 2007. Punonim bashkë, jemi njohur në korridoret e ministrisë së Financave. Kemi 16 vite që jemi bashke. Kemi qenë të fejuar, nuk kemi bërë këto fejesat tradicionale. Si financierë na dukej shpenzim i kotë parash, nuk i kemi kryer. Kemi ndenjur 7 vite bashkë. Dhe me ardhjen e vajzës lidhja jonë u forcua dhe më tepër dhe u bë më e bukur. E quaj veten me fat për bashkëshorten. Ne kemi gjetur përputhshmëri, jemi të ngjashëm dhe ajo ka qenë e mirëkuptueshme për fushata e në gjëra të tilla, kur ka pasur dhe ditë kur vetëm shkëmbeheshim. E falënderoj dhe për tolerancën, ajo e ka kuptuar dhe më ka dhënë mbështetje për angazhimet e mia”.
“Të dy jemi ekonomisë, merremi me financat. Të dy bëjmë shpenzime, të dy ndihmojmë njeri-tjetrin, të dy bëjmë pazaret. Jemi në sintoni të plotë. Nuk kemi ndarje. I kam kryer të gjithë detyrat që mund të ketë shtëpia. Kur bashkëshortja ka qenë shtatzënë dhe ka pasur nevojë i kam dhënë më shumë ndihmë”.
Teliti rrëfeu se kritikuesit e tij më të mëdhenj dhe janë prindërit dhe nëse ka ndonjë person që ai do dëshironte të bënte krenar është babai i tij.
“Kritikuesit më të mëdhenj janë prindërit. Prindërit më japin sugjerime dhe janë të vlefshme, nëse dua të bëj krenar dikë është babi im së pari dhe mamaja më pas. E pyes gjithmonë ndonëse u bë 11 vjet që dal në Tv ai mbetet etaloni matës i përformancës sime”.
