HIMARË– Debate të forta në mbledhjen e konstituimit të Këshillit Bashkiak të Himarës. Raportohet se mbështetësit e kryebashkiakut të zgjedhur Fredi Beleri kërkuan që punonjësit aktualë të bashkisë të dalin jashtë sallës dhe të qëndrojnë brenda vetëm mbështetësit e tij. Ndërkohë fjala e të pranishmëve është shoqëruar me nderhyrje dhe debat. Në sallën ndodhet i deleguari i Partisë Socialiste për Vlorën Blendi Klosi.
Ndërkohë pak minuta më parë kanë mbërritur dhe kreu i Partisë Bashkimi për të Drejtat e Njeriut Vangjel Dule dhe ambasadorja greke në Tiranë Eleni Sourani. Jashtë godinës mbështetësit e Belerit po përplasen me Policinë pasi duan të futen brenda. Derisa Gjykata e Posaçme Kundër Korrupsionit dhe Krimit të Organizuar të dalë me një vendim të prerë Beleri do të qëndrojë në burg ndërsa detyrën e kryetarit të bashkisë do e kryejë kryetari aktual socialist Jorgo Goro.
Fredi Beleri u arrestua nga Policia e Vlorës një natë para zgjedhjeve vendore të 14 majit nën akuzën e “Korrupsionit aktiv në zgjedhje”. Çështja i kaloi për hetim Prokurorisë së Posaçme Kundër Korrupsionit dhe Krimit të Organizuar (SPAK). Pak ditë më parë Gjykata e Posaçme i caktoi masën e arrestit me burg ndërsa Komisioni Qëndror i Zgjedhjeve i dha mandatin e kryebashkiakut.
