TIRANË– Ministrja për Europën dhe Punët e Jashtme Olta Xhaçka ka reaguar këtë të enjte në lidhje situatën e tensionuar në veri të Kosovës. Gjatë fjalës së saj Xhaçka i kërkoi qeverisë së Kosovës dhe autoriteteve që të dëgjojnë partnerët ndërkombëtarë për normalizimin e marrëdhënieve. Sipas saj Shqipëria është e gatshme që të angazhohet me çdo mjet për të garantuar paqen.
Olta Xhaçka: Është e domosdoshme që situata të shtensionohet, është e domosdoshme që qeveria e Kosovës të dëgjojë partnerët tanë ndërkombëtarë, aleatët tanë SHBA dhe BE për shtensionimin e situatës. Duhet të ndalet thellimi i hendekut të qëndrimeve me SHBA e BE sepse pasojat janë vërtet të rënda. Dialogu i lehtësuar nga BE është rruga drejt normalizimit të marrëdhënieve ndërmjet Kosovës dhe Serbisë. Dialogu Kosovë-Serbi është rruga e vetme drejt paqes, por kjo kërkon guxim. Shqipëria mbetet plotësisht e angazhuar për të kontribuar me çdo mjet e më të gjithë mundësitë e saj. Por jo duke vazhduar në rrugën e përplasjes me të gjithë miqtë e aleatët, sepse nga kjo Kosova nuk mund të dalë kurrë e fituar.
