KUKËS– Një 33-vjeçar i identifikuar me inicialet A.B, banues në Zyrih është vënë në pranga në Pikën Kufitare të Morinës pasi u kap në tentativë për të kaluar drogë. I riu u pikas në vijën e dytë të kontrollit. Ai e kishte fshehur lëndën narkotike ekstazi në mjet të ndarë në katër paki.
NJOFTIMI I POLICISË:
Morinë, Kukës . Tentoi të trafikonte lëndë narkotike në Shqipëri, vihet në pranga 33-vjeçari. Shërbimet e Policisë Kufitare Morinë, në vijim të punës për parandalimin dhe goditjen e krimeve kufitare, bazuar në inteligjencën informative dhe në analizën e riskut, në hyrje të RSH-së, kanë kaluar në vijë të dytë, për kontroll më të imtësishëm, një automjet taksi.
Gjatë kontrollit të ushtruar në vijën e dytë, në automjetin taksi në të cilën udhëtonte si pasagjer shtetasi A. B., shërbimet e Policisë gjetën dhe sekuestruan 4 pako me lëndë të dyshuar narkotike ekstazi.
Në përfundim të veprimeve hetimore, specialistët për Hetimin e Trafiqeve të Paligjshme dhe Narkotikëve të DVP Kukës arrestuan në flagrancë shtetasin A. B., 33 vjeç, banues në Zyrih, për veprën penale “Trafikimi i narkotikëve”. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
