TIRANË– Dy turq janë vënë nën hetim këtë të premte nga Policia e Tiranës pasi u kapën me 47 450 euro të padeklaruara në Pikën Kufitare të Rinasit. Përmes një njoftimi për mediat blutë e kryeqytetit bëjnë me dije se qytetarët turk të identifikuar me inicilaet E.G, 63 vjeç, dhe S.S, 35 vjeç, të dy banues në Stamboll do të akuzohen për veprën penale “Mosdeklarimi në kufi i të hollave dhe i sendeve me vlerë”. Materialet procedurale i kaluan Prokurorisë për hetime të mëtejshme.
NJOFTIMI I POLICISË:
Rinas/Policia Kufitare godet 2 raste të tjera të mosdeklarimit të të hollave.. Sekuestrohen 47 450 euro. Procedohen penalisht 2 shtetasit turq që nuk i deklaruan në kufi, siç përcaktohet në ligj. Shërbimet e Policisë Kufitare Rinas, në vijim të kontrolleve të shtuara, të bazuara në analizën e riskut, për evidentimin dhe goditjen e paligjshmërive, në dalje të RSh-së, kanë kaluar në vijën e dytë, për kontroll të detajuar, shtetasit turq E. G. dhe S. S.
Gjatë kontrollit fizik dhe kontrollit të çantave të shpinës, shtetasit E. G. i janë gjetur 30 450 euro, ndërsa shtetasit S. S. i janë gjetur 17 000 euro, të cilat këta shtetas nuk i kishin deklaruar në kufi, siç e përcakton ligji. Në cilësinë e provës materiale u sekuestruan 47 450 euro. Në vijim të veprimeve nisi procedimi në gjendje të lirë për poseduesit e shumave të parave, shtetasit E. G., 63 vjeç, dhe S. S., 35 vjeç, të dy banues në Stamboll, Turqi, për veprën penale “Mosdeklarimi në kufi i të hollave dhe i sendeve me vlerë”. Materialet procedurale u referuan në Prokurorinë pranë Gjykatës së Rrethit Gjyqësor Tiranë.
