TIRANË– Kryeministri Edi Rama ka publikuar këtë të shtunë podacastin e radhës ku të ftuar ka pasur sipërmarrësin nga Lushnja Agim Xhindoli, i cili rrëfeu në intervistë me Ramën dhe vështirësitë e tij gjatë emigrimit në Itali si dhe kthimin në Shqipëri ku tashmë është një sipërmarrës. Po gjatë intervistes dhe kreu i qeverisë ka rrëfyer dy momentet e tij në Lushnje që kanë lënë dhe një shenjë tek ai. Një sipas Ramës kur dikush ka dashur ta vrasë me çekeç dhe një tjetër kur është kërcënuar për stilin e tij.
Agim Xhindoli: Në vitin ’87, kur keni bërë Muzeun e Lushnjes, në shkonim gjithmonë tek Blerimi që pinim kafe. Ne të rinjtë ju shikonim…ti ke qenë rebel, të shihnim si idhull. Ta them me sinqeritet.
Edi Rama: Më kujtohet kur kam ardhur në Lushnje për herën e parë. Ishte duke u ndërtuar Muzeu, e bashkë me Vladimir Myrtezain morëm porosi që të përshkuanim Shqipërinë e kohës së Zogut. Ishte mundësi që të kishim dorë të lirë se justifikoheshim me kohën e Zogut. Dy episode kam të paharrueshme; zbresim nga treni, futemi në hotel, nuk kishte ujë. Bie telefoni dhe thotë ‘ju pret poshtë i plotfuqishmi’. I thashë nuk kam asnjë takim me asnjë të plotfuqishëm dhe e mbyll telefonin. Pas pak bie dera. Hap derën shoh një personazh me kostum gri. Më thotë; atë mjekrrën do ta rruash vetë, apo do të ta rruajmë ne, gjatosh! Këtu është Lushnje tha nuk është Tiranë. Ke 30 min të rruhesh tha dhe të mos të të shkojë mendja të dalësh pa u rruajtur. I thashë nuk kam ujë. Shiko e bëj tha. I thashë do dal. Episodi tjetër ishte kur ne po bënim pikturën, na thoshim ç’është ky ka, jo po kjo, jo po ajo. Vendosën që të vinin veteranët që ta shihnin, meqë ata e kishin parë kohën e Zogut. Çfarë skene! Ishte njëri, një person që më ndiqte mua në Lushnje, me çekiç të mbështjellë në gazetë dhe thoshte: Unë atë do ta vras. Por unë kisha ëngjëllin tim mbrojtës, Gjergji Velon. Mblidhen veteranët, nga fundi i sallës lëshon ai çekiçin, bie tek piktura. Këto 2 episode mbaj mend nga Lushnja.
