TIRANË– Kryeministri Edi Rama ka njoftuar pasditën e kësaj të premte se data 13 shkurt do të jetë ditë zie kombëtare në shenjë homazhi për viktimat e tërmetit në kufirin turko-sirian. Rama shprehet se kjo është një shenjë solidariteti me Turqinë, si një vend mik që u gjend pranë Shqipërisë kur ndodhi tërmeti i 26 nëntorit në vitin 2019, po ashtu ka shtuar më tej se flamuri kombëtar do të ulet në gjysmë shtizë dhe jep mesazh për të gjithë qytetarët që të ndezin në shenjë homazhi nga një qiri.
POSTIMI I RAMËS:
Qeveria Shqiptare ka vendosur që e hëna, 13 shkurt, do të jetë DITË ZIE KOMBËTARE në shenjë dhimbjeje e lutjeje për viktimat e tragjedisë së madhe të tërmetit në kufirin turko-sirian, si edhe në shenjë solidariteti me Turqinë mike, e cila na u gjend pranë kur një fatkeqësi e ngjashme goditi Shqipërinë pak kohë më parë. Ulja e flamurit kombëtar në gjysmë shtize dhe ndezja e një qiriri nga çdonjëri sipas dëshirës e mundësisë, do të jenë shenjat kuptimplota të një të hëne të shenjuar prej dhimbjes njerëzore e solidaritetit popullor që i kapërcejnë kufijtë tanë.
