Tifozët e Al Nassr janë kthyer kundër Cristiano Ronaldos pas humbjes zhgënjyese ndaj Al Ittihad, e cila i dha fund shpresave për titullin kampion këtë sezon.
Ylli portugez, i cili nuk arriti të shënojë në këtë ndeshje, u kap nga kamerat duke shprehur hapur frustrimin e tij kur Aouar realizoi në minutën e 94-t. Gjestet e tij u konsideruan fyese dhe arrogante nga shumë tifozë, të cilët shpërthyen në rrjetet sociale.
“Shikoni si po sillet kapiteni ynë qaraman. CR7 është gjëja më e keqe që i ka ndodhur Al Nassr”, shkroi një përdorues në X, ndërsa të tjerë kërkuan që Ronaldos t’i hiqet shiriti i kapitenit dhe të largohet menjëherë nga klubi.
Komentet vazhdojnë me tone të ashpra:
“Po i lëviz duart sikur të ketë bërë diçka këtë sezon”,
“Ai e mashtroi Al Nassr për 3 vjet me 900 milionë dollarë”,
“Filloni me shiritin, ai nuk e meriton”.
Ronaldo është vënë sërish në qendër të kritikave në Arabinë Saudite, me shumë tifozë që tani e shohin si pengesë dhe jo si shpëtimtar të skuadrës së tyre.
