TIRANË– Adriana Kalaja, një nga 7 kandidatet e PD-së në primaret për Tiranën ka bërë një deklaratë të fortë ditën e sotme ku i ka kërkuar mjekut Ilir Alimehmeti që të tërhiqet nga gara dhe të lërë Belind Këlliçin që të nisë betejën kundër kryebashkiakut Erion Veliaj për zgjedhjet lokale. Në një prononcim për Ora News, Kalaja thotë se nuk është në interesin e PD-së që gara të shtyhet akoma, por duhet mbyllur që sot. Sipas saj Këlliçi dukshëm e fitoi këtë garë dhe do të ishte në dinjitetin e Alimehmetit që të tërhiqet.
“Sot për interes të PD-së duhet të mbyllet gara. Nuk duhet të ketë balotazh. Nëse do të isha në vend të dytë do të kërkoja dorëheqjen dhe nëse ka pak dinjitet zoti Alimehmeti duhet ta bëjë. Me pikët që ka fituar, Belind Këlliçi është fitues real dhe moral Unë po të isha në vend të dytë nuk do e çoja prapë PD-në në balotazh. Nga sot duhet të përgatitemi për 14 majin. Për mua Belindi është fitues dhe unë nuk kam asnjë dyshim në këtë pike,”- thotë Kalaja.
Gara e Tiranës ishte një betejë e fortë mes tre nga shtatë kandidatët në garë. Deputeti Belind Këlliçi dhe mjeku Ilir Alimehmeti ishin ‘kokë më kokë’ pothuajse në të gjitha qendrat e votimit. Tirana nuk arriti dot të nxirrte një kandidat fitues duke shkuar në balotazh, kjo pasi asnjë nga kandidatët nuk arriti të marrë më shumë se 50% të votave që i duheshin për të kaluar garën. Zgjedhjet e ardhshme për Tiranën do të mbahen të dielën e 11 dhjetorit.
