TIRANË– Ngjarjet kriminale në vend nuk kanë të sosur. Pas plagosjes me thikë të regjistruar mes dy nxënësve në Kamëz, dy raste të tjerë të plagosjeve me thjikë janë regjistruar gjatë 24 orëve të fundit në kryeqytet. Policia bën me dije se pas një sherri për motive të dobëta një 20-vjeçar ka goditur me thoikë një 18-vjeçari, i cili është transportuar në spital dhe ndodhet në kujdesin e mjekëve. Ndërkohë dy persona të tjerë janë arrestuar për vjedhje.
NJOFTIMI I POLICISË:
Tiranë/Vihen në pranga 5 shtetas dhe procedohet penalisht 1 tjetër, për vepra të ndryshme penale. Specialistët për Hetimin e Krimeve të Komisariatit të Policisë Nr. 2 arrestuan shtetasit:
– A. B., 20 vjeç, banues në Tiranë, pasi ka goditur me mjet prerës, për motive të dobëta, shtetasin E. T., 18 vjeç, banues në Tiranë, i cili ndodhet në spital, në kujdesin e mjekëve;
– K. Sh., 21 vjeç, si dhe nisi procedimi në gjendje të lirë për shtetasin F. Z., 25 vjeç, të dy banues në Tiranë, pasi në rrugën “Qerazim Qirjazi”, kanë hedhur në tokë, një mjet prerës thikë, kur kanë parë shërbimet e Policisë. Pas verifikimeve të kryera ka rezultuar se shtetasi K. Sh. kishte thyer masën e sigurisë “Arrest në shtëpi”.
Specialistët për Hetimin e Krimeve të Komisariatit të Policisë Nr. 5 arrestuan një shtetas të mitur 15 vjeç, pasi ditën e djeshme, në Paskuqan, ka goditur me mjet prerës, një bashkëmoshatar të tij, i cili ndodhet në spital, në kujdesin e mjekëve.
Specialistët për Hetimin e Krimeve të Komisariatit të Policisë Nr. 6 arrestuan shtetasit F. T., 32 vjeç, dhe A. H., 40 vjeç, të dy banues në Tiranë, pasi kanë vjedhur targat e një automjeti, si dhe janë larguar pa kryer pagesën pas furnizimit të automjetit, në një pikë karburanti. Materialet i kaluan Prokurorisë, për veprime të mëtejshme.
