INDI-Mbrëmjen e së premtes, një tren me pasagjerë doli nga shinat dhe u përplas me një tren mallrash në qarkun Balasore të Odishas, gjë e cila shkaktoi një tragjedi të vërtetë . Numri i viktimave ka shkuar në 288, dhe mbi 1000 të plagosur. Pritet që numri i viktimave të ketë një rritje të vazhdueshme duke qenë se shumë njerëz kanë mbetur të bllokuar nën vagona.
Ushtria indiane, ekipe nga Forca Kombëtare e Reagimit ndaj Fatkeqësive, Forca e Veprimit të Shpejtë të Fatkeqësive Odisha dhe shërbimet e zjarrit të shtetit janë dërguar në vend.
Një zyrtar i lartë tha se rreth 850 njerëz janë shtruar në spital, dhe qindra të tjerë janë mbledhur jshtë spitaleve për të dhuruar gjak.
India ka patur shumë raste të tjera me aksidente vdekjeprurës, por ky që ndodhi ditën e djeshme është një nga më vdekjeprurësit që kanë ndodhur përgjatë kohëve të fundit në atë vend, ku aksidenti më i rëndë në historinë e Indisë ndodhi më 6 qershor të vitit 1981 kur një tren pasagjerësh doli nga shinat në shtetin e Biharit dhe shtatë vagonë ranë nga një urë në ujërat e lumit Bagmati, duke vrarë mbi 800 njerëz.
