GJERMANI– Të paktën 35 persona janë plagosur në një aksident tragjik të ndodhur këtë të premte në Gjermani. Një autobus me rreth 60 pasagjerë teksa udhëtonte nga Varshava për në Belgjikë, ka dalë jashtë rruge duke u përmbysur pranë Magdeburgut në Gjermani. Ndërkohë të lënduarit u transportuan me urgjencë në spitalet e afërta rreth zonës.
Në lidhje me aksidentin ka reaguar edhe ambasada polake në Berlin, ku ka treguar se në aksident janë lënduar shumë pasagjerë, mes tyre edhe shtetas polakë, ndërsa zëdhënësi i Ministrisë së Jashtme të Polonisë, Lukasz Jasina, tha se 35 persona ishin lënduar në aksident dhe se jeta e askujt nuk ishte në rrezik.
Gjashtëdhjetë persona, jo vetëm shtetas polakë, por edhe shtetas ukrainas dhe bjellorusë, ishin pasagjerë në autobus.
Dariusz Pawlos, ambasadori i Polonisë në Berlin në një deklaratë të tijen u shpreh se kjo është një ditë e trishtuar për të gjithë, duke shtuar më tej se shërbimet gjermane funksionojnë me efikasitet dhe profesionalizëm, Palwlos tregoi se edhe konsujt polakë kanë shkuar në vendin e ngjarjes për të ofruar ndihmën e duhur nga ana tyre.
