Një tren ka dalë nga binarët këtë të dielë në Pakistan. Si pasojë 30 persona kanë mbetur të vdekur dhe 100 të tjerë janë plagosur.
Younis Chandio, zyrtar i lartë policor, tha për mediat lokale më 6 gusht se operacionet e shpëtimit kanë nisur për t’i nxjerrë njerëzit nga vagonët.
Ai tha se 10 vagonë të trenit dolën nga binarët. Ndërkohë, ministri i Hekurudhës i Pakistanit, Khawaja Saad Rafique, tha se “ky është një aksident shumë i madh. Ekipet e shpëtimit kanë mbërritur në vendngjarje”.
Aksidentet dhe daljet e trenit nga binarët ndodhin shpesh në sistemin e vjetruar hekurudhor në Pakistan. Në qershor 2021, dy trena u përplasën mes vete afër Daharkit në Sindh, duke i vrarë të paktën 65 njerëz dhe duke i lënduar rreth 150 të tjerë.
