Këtë të hënë në Berlin, Samiti i Procesit të Berlinit 2024 mblodhi krerët e shteteve dhe qeverive të gjashtë vendeve të Ballkanit Perëndimor: Shqipërisë, Bosnjë-Hercegovinës, Malit të Zi, Kosovës, Maqedonisë së Veriut dhe Serbisë, si dhe përfaqësues të vendeve anëtare të Bashkimit Evropian që janë të angazhuara në proces.
Punimet u përfunduan me nënshkrimin e disa deklaratave të rëndësishme, duke përfshirë marrëveshjet për Tregun e Përbashkët Rajonal të Ballkanit Perëndimor dhe për pranimin dhe studimin në Arsimin e Lartë.
Presidentja e Komisionit Evropian, Ursula von der Leyen, ishte gjithashtu e pranishme në këtë samit, duke përfaqësuar BE-në. Procesi i Berlinit u iniciua në vitin 2014 nga ish-kancelarja gjermane Angela Merkel, me qëllimin për të ndihmuar vendet e Ballkanit Perëndimor të afrohen më shumë me Bashkimin Evropian dhe për të përmbushur rekomandimet e dhëna në Samitin e Selanikut në vitin 2003, kur këtyre vendeve iu premtua anëtarësimi në BE.
