Holanda është çerekfinalistja e parë e Kupës së Botës “Katar 2022”. “Tulipanët” kanë arritur të fitojnë me rezultatin 3-1 përballë ShBA-së në “Khalifa International Stadium” të Dohas.
Sfida u zhbllokua që në minutën e ’10 me Depay, teksa para se sa ekipet të shkonin në dhomat e zhveshjes çoi topin në rrjetë edhe Blind, duke u mbyllur në avantazhin e dyfishtë të Holandës fraksioni i parë i lojës.
Në pjesën e dytë, amerikanët ishin më kërkues dhe arritën të shkurtonin diferenca në minutën e ’76 me Wright. Por, 5 minuta më vonë shënoi për “tulipanët” Dumfries, duke i dhënë një fitore me rezultat të pastër ekipit të tij.
Në çerekfinale, Holanda do të luajë përballë fituesit të çiftit Argjentinë-Australi që do të luhet sonte në mbrëmje.
