Oksidi i azotit është një substancë që thithet nga një tullumbace. Ai është përdorur në mënyrë rekreative për më shumë se 200 vjet. Gazi vjen i mbushur në bombola të vogla metalike, të cilat futen në një ‘cracker’ ose në një shpërndarës të ngjashëm me kremin pana në mënyrë që përmbajtja e gazit të mund të futet në një tullumbace.
Efektet e oksidit të azotit zgjasin nga 1 deri në 5 minuta. Por pasojat e përdorimit të kësaj substance mund të jenë afat gjatë deri në fatale. Thithja e oksidit të azotit shkakton eufori, relaksim dhe një gjendje halucinative. Përdorimi afatgjatë, ose i zakonshëm mund të çojë në dëmtime të rënda neurologjike. Meqenëse oksidi i azotit mund të shkaktojë marramendje, shkëputje dhe humbje të përkohshme të kontrollit, është e pasigurt ta thithësh gjatë qëndrimit në këmbë.
Në Tiranë tregtohet në lokale
Në Tiranë këtë lloj droge e gjen për vetëm 300 lekë një tullumbac. Një pjesë e mirë e rinisë shqiptare është “infektuar” nga vese tejet të dëmshme për shëndetin, siç janë pirja e duhanit, konsumimi i lëndëve narkotike, apo kryejnë veprimtari të tjera të papërshtatshme për moshën e tyre. Tirana, dhe jo vetëm, është kthyer në qytetin që po thith trendet e fundit të drogave mjaft të rrezikshme për shëndetin e të rinjve.
Në vitin e fundit, agjentët e antidrogës janë hasur disa herë me lloje të ndryshme lëndësh narkotike që shpërndahen për herë të parë në Shqipëri, të cilat nuk diheshin se ekzistonin në tregun e paligjshëm vendas. Prej disa muajsh në Shqipëri qarkullon një substancë, e cila mund të gjendet fare thjesht edhe në lokale, një lloj droge që merret me tullumbace.
Alarmi nga disa shtete
Dukjen e ka si një fishek, por pasi hidhet në tullumbace thithet njëlloj si heliumi që ndryshon zërin. Por kjo drogë nuk është si heliumi dhe pa pasoja. Bëhet fjalë për oksidin e azotit, për të cilin në perëndim është dhënë alarmi për pasojat që sjellë në shëndet dhe disa shtete po mendojnë masa konkrete për ta konsideruar të paligjshme.
Droga tullumbace njihet si gazi që të bën vetëm për të qeshur dhe me konsumin e parë shkakton eufori, shqisat ndryshojnë, ka çorientim dhe ankthi zvogëlohet.
Në këtë pikë ku së fundmi janë bërë virale mjaft video që tregojnë adoleshentë dhe të rinj të “fiksuar” pas kësaj substance, tashmë të kthyer në trend, lind menjëherë nevoja e ndryshimeve ligjore me synim mbrojtjen e të rinjve nga kjo lloj substance e rrezikshme.
/ Newszone
