TIRANË– Në përmbyllje të turit të tij elektoral në jug të vendit ku prezantoi kandidatët për kryetar bashkie të koalicionit “Bashkë Fitojmë” kryetari i Partisë Demokratike Sali Berisha ka dalë në një konferencë për mediat ku ka dhënë detaje nga takimet me demokratët dhe qytetarët.
Sipas tij socialsiteëtë e urrejnë rilindjen ndërsa vuri në “shënjestër” të sulmeve ministren e Mjedist dhe Turizmit Mirela Kumbaro dhe ish-Sekretraren e Përgjithshme të kësaj ministrie Elira Kokona. Sipas liderit demokrat ato janë të zhytura në afera. Në “shënjestren” e Berishës ishte dhe gazetari Mero Baze.
Pjesë nga fjala e Berishës:
Në jug konstatova se socialistët urrenin masivisht Rilindjen si një sekt hajnie. Konstatova se Edi Rama kishte filluar terrorin, angazhuar policinë, policinë bashkiake për të terrorizuar qytetarët. Por nga ana tjetër, e sigurt është se kandidatët e primarëve do jenë kandidatët e fitores. Libohova, ju e patë vetë, një pritje e zjarrtë, një revoltë e thellë. Se çfarë kishte bërë Edi Rama me ndrikull-Sherrin, kishin hequr kandidatin e tyre dhe kishin vu kushëririn e parë të kandidatit të primareve. Konstatova se në Libohovë, deputetes Kumbaro nuk i thërriste kush Kumbaro, i thërrisnin Mirela Sherri. Kësaj deputete i del emri në shumë afera, jo vetëm në ministri me tendera, të cilat përbëjnë secili vepër të rënda penale, por mos harroni se Elira Kokona, sekretare e përgjithshme e saj për vite të tëra, mbronte si avokate, paditësit e shtetit, dhe ndante paratë në atë kohë me Mirela Sherrin dhe pastaj me Edi Ramën dhe Engjëll Agaçin. Adil Xhelili, kandidati ynë, kishte një simpati të madhe në banorët e Libohovës, kishte një projekt të vërtetë për ndryshimin e Libohovës. Një situatë dramatike, por një vendosmëri e madhe për një kthesë historike. Një vetëdije e plotë se Edi Rama përbën një rrezik. Regjimi i tij është shkatërrimtar për Shqipërinë dhe jugun. Por kudo konstatova se atë në fakt e konsideronin gjithashtu të përfunduar me aferën McGonigal. Banorët kudo ishin të sigurt se shumë shpejt e pret fati i McGonigalit dhe nuk kishin ndërmend të besonin mashtrimet e tij, “Në Këlcyrë, kandidati i Ymer Bazes, di vetëm të vjedhë. Shkoni e shikoni tubat e ujësjellësit. 3 milionë euro taksa të shqiptarëve, ato çahen njëri pas tjetrit se janë tuba të vjetruar, të përdorur për dekada. Edhe ai me mision. Po cili është misioni? Fshatarët e Mezhgoranit t’u marrin ujin dhe të ndërtohet aty një fabrikë uji për Ymer Bazen. I them Edi Ramës, që Ymer Baze le të lëpihet nga mëngjesi deri në darkë, por ujin e Mezhgoranit nuk do e marrë kurrë. Se më thanë se kanë filluar të shpërndajnë ryshfete. T’i marrësh ujin Mezhgoranit, do të thotë që do largohet çdo banor nga ai fshat, do të thotë të krijosh kushte për pasurimin e Ymerit. Ymerit shpërbleja në mënyra të tjera, por ujin mos e prek. Ujin e Mezhgoranit. Se është krim. Arjan Kasa është kandidati që do mbrojë interesat e çdo banori të Këlcyrës. Edmond Komino, një kandidat i shkëlqyer për Përmetin, një demokrat që ka shkrirë të gjithë aftësitë e tij për qytetin. Gjatë qeverisjes së PD, Përmeti ndryshoi më shumë se në të gjithë kohërat tjera. Edhe kandidati i Përmetit, në funksion të interesave të mafies sub-qeveritare. Kam bindjen se Edmond Komino do të mbrojë interesat e qytetarëve të Përmetit. Në Derviçan, një biznesmen i shkëlqyer, një bir i shquar i minoritetet grek, me investime serioze në Athinë, është rikthyer, ka fituar në primare dhe tani garon për kryetar bashkie. Një njeri me kredenciale të larta, i respektuar nga i gjithë spektri politik, përveç Rilindjes. Në Sarandë, mafia e Durrësit, e cila po humbet Durrësin falë fitores së Igli Carës, është vërsulur të pushtojë Sarandën. Me të deleguarin personal të famëziut Alket Hyseni. I cili ka marrë përsipër të zhvarrosë të vdekurit në Sarandë për të ndërtuar pallate qeveritarët. Zhvarrosja e të vdekurve, mision kryesor i mafiozit të Alket Hysenit, i cili ka përballë Ardit Cikulin, një qytetar shembullor, serioz, të përkushtuar, ndaj të cilit nuk rëndon as edhe një aferë, përkundrazi virtyti, përkushtimi, aftësia e Ardit Cikulit kishte fituar zemrën dhe mendjen e qytetarëve të Sarandës. Akuzohej direkt ministri i familjes për dhjetëra e dhjetëra hektarë të marrë me emër tjetër. Do i bllokohen. U zotua solemnisht kryetari i ardhshëm i bashkisë së Konispolit, Fatmir Shero se kjo nuk mund të ndodhë. Në Delvinë, Ilir Mehmeti, kandidati i fitores, një qytetar i shkëlqyer, karshi tij, njeriu që e kishte vëllanë të dënuar për ngarkesa të mëdha kokaine në Itali, kushëriri i famëziut Ardi Veliu. Ai vërtet është i dënuar për kokainë, por dosjet e Ardi Veliut janë dhjetë herë më kriminale dhe të rënda. Kanë vendosur që darën e mafies ta shtrëngojnë më shumë në jug. Por Delvina do të thotë fjalën e saj. E gjeta më të zjarrtë se kurrë, më të vendosur se kurrë për t’u dhënë atë që meritojnë. Në Tepelenë, Tërmeti që e ka vendin në qeli, ka përballë një nga inxhinierët më të shquar të Tepelenës, i ardhur nga Kanadaja për të derdhur të gjithë aftësitë e tij, dashurinë dhe përkushtimin për Tepelenën. Në Tepelenë dhe kudo në jug, koha ka ndaluar. Investimet janë zero. Jugu po shkretohej me shpejtësi të madhe. Në Memaliaj, qytetari duhej të merrte te polici që të hynte te ish-kryetari, që nuk mendon gjë tjetër vetëm të ndante paratë e tenderave. Karshi tij, një kandidat i atdheut, që i ka shërbyer vendit në Afganistan. Një njeri popullor, me aftësi të mëdha.
