BERAT– Turistët italianë që ikën pa paguar faturën në një restorant në Berat janë kthyer në një nga temat më të diskutueshme jo vetëm në mediat shqiptare por dhe ato italiane, madje janë kthyer dhe në një sensacion që përfshiu në debat dhe politikën në Itali, ku opozita i kërkonte llogari kryeministres Georgia Meloni dhe kur kjo e fundit deklaroi se e kishte paguar vetë faturën. Ndërkohë ka ardhur reagimi i parë nga vetë pronarët e lokalit ku ndodhi dhe incidenti. Ata shprehen mirënjohës ndaj aktit të Melonit dhe shtojnë se paratë i kanë ruajtur si kujtim për ‘’syrin e keq’’.
Gabriela Kadena: Gazetarët dhe kanalet televizive shqiptare dhe italiane na kanë kontaktuar, por nuk kemi lejuar asnjë intervistë. Ata turistë italianë që ikën pa paguar, na kanë bërë një publicitet të madh për qytetin tonë. Le t’i falënderojmë! Tashmë e thamë se kjo nuk ishte problem pasi italianët janë në shtëpi, shumë prej tyre vijnë si familjarët tanë në Itali kur emigruam. Ne urojmë që ta kenë shijuar ushqimin. Shpresojmë që ato para t’i kenë shpenzuar për diçka të bukur! Falenderojmë përzemërsisht Georgia Meloni, një zonjë e vërtetë! Ne nuk jemi të pasur, ne punojmë shumë si familje, nuk bëjmë aq shumë sa të mos të na bëjnë përshtypje ato para! Por kjo nuk është çështje parash për ne dhe jemi shumë të prekur nga gjesti i saj! Një shembull i shkëlqyer dinjiteti nga një nënë e mirë strikte që i jep shembull shtëpisë së saj! Georgia e madhe! E duam shumë edhe si gjysmë italiane qe jemi! Na nderoi shumë me ardhjen në pushime në Vlorë! Në foto janë paratë që na u dërguan me ambasadë. Ata do të qëndrojnë këtu në restorant si një kujtim i jashtëzakonshëm dhe gjithashtu kundër syrit të keq. Faleminderit kryeministrja Meloni, Viva Itali, Viva Albania!
