Erind Mrruku është arrestuar në Kamëz nga Policia e Tiranës sepse lëviste i armatosur.
Mësohet se Mrruku ka qenë i dënuar 13 vite më parë për vrasje me dashje. Ai ka vrarë në vitin 2010, 25-vjeçarin Fabian Nikaj.
Si ka ndodhur e gjithë ngjarja:
Nikaj u ekzekutua në orët e vona në lagjen “Besëlidhja” në Lezhë, vetëm pak metra larg komisariatit të policisë.
Të rinjtë kishin qenë duke diskutuar me tone të larta në një nga lokalet e Shëngjinit, ndërsa molla e sherrit dyshohet se ka qenë një vajzë.
Më pas Erind Mrruku, i cili dyshohet të ketë qenë i shoqëruar edhe nga disa djem të tjerë, e ka ndjekur Nikajn me makinë deri në qytetin e Lezhës ku dhe e ka qëlluar me armë zjarri. Erind Mrruku u vetëdorëzua vetë në polici. Viktima ishte i dashuri i një këngëtareje të njohur.
Burime nga policia thonë se Erind Mrruku dyshohet si anëtarë i një grupi kriminal që vepron në Tiranë. Pasi u mor në pyetje, ai nuk ka pranuar të japë deklarime. Por për shkak se arma ishte me fishek gati për qitje, policia dyshon se mund ta përdorte në ndonjë ngjarje.
