TIRANË– Apeli i Posaçëm Kundër Korrupsionit dhe Krimit të Organizuar ka lënë në burg këtë të premte Valter Bamin, të arrestuar nga Policia si autor i dyshuar në atentatin e Larushkut ndaj Gentjan Bejtjas më 7 korrik të këtij viti por që mbeti i vrarë kunati i këtij të fundit Ramazan Sino dhe u plagosën dy djemtë e mitur të Bejtjas. Avokatët nuk i kanë bindur dot togat e zeza të Apelit të GJKKO-së.
Valter Bami u arrestua për armëmbajtje pa leje por sipas ekspertëve në duart e tij u gjetën gjurmë baruti që shton dyshimet e përfshirjes së tij në atentat. Deri më tani Valter Bami i ka mohuar akuzat dhe ka deklaruar se gjurmët e barutit mund të kenë ngelur nga çiftja që ia ka me leje me të cilën ka bërë qitje së fundmi. Të njëjtin qëndrim ka pasur dhe avokati mbrojtjes i tij. Deri më tani Policia dhe Prokuroria nuk kanë asnjë provë konkrete që mund ta mbajë Bamin në burg ndërkohë që atentati mbetet ende i pazbardhur pavarësisht se ka pasur dhjetëra të shoqëruar në Polici.
