LUSHNJE– Prokuroria e Lushnjes ka nisur këtë të mërkurë zyrtarisht hetimet për vdekjen e Javier Carraso Cervilla, shtetasit spanjoll që u gjet i vdekur në një hotel në Divjakë. Në njoftimin zyrtar Prokuroria bën me dije se të gjitha të dhënat e përftuara deri në këtë fazë po analizohen dhe kryqëzohen me njëra-tjetrën, me qëllim përcaktimin e shkakut të ardhjes së pasojës.
Spanjolli Javier Carraso Cervilla u gjet i vdekur me thikë nga shoku i tij i dhomës teksa ai po lahej në dush. Në fillim ngjarja u raportua si vetëvrasja por me sa duket hetimet kanë marrë rrjedhë tjetër. Cervilla ishte i divorcuar dhe prej kohësh jetonte në hotelin ku u gjet pa jetë.
NJOFTIMI:
Prokuroria pranë Gjykatës së Shkallës së Parë Lushnjë ka regjistruar procedimin penal nr. 146, të vitit 2023, për veprat penale “Shkaktimi i vetëvrasjes”, parashikuar nga neni 99 i Kodit Penal, pa autor, lidhur me vdekjen e shtetasit spanjoll Francisco Javier Carraso Cervilla. Ky procedim penal ka filluar mbi bazën e materialeve të dërguara nga Komisariati i Policisë Divjakë.
Regjistrimi i këtij procedimi penal është bërë me qëllim kryerjen e një hetimi të plotë dhe të gjithanshëm për dinamikën dhe shkaqet e ngjarjes. Ky procedim është në fazën fillestare të tij dhe nisur nga natyra e çështjes janë kryer veprimet e plota hetimore që konsistojnë në këqyrjen e vendit të ngjarjes, sekuestrimin e provave materiale dhe këqyrjen e tyre, janë marrë vendimet e nevojshme të ekspertimit, janë pyetur persona që kanë dijeni për ngjarjen.
Të gjitha të dhënat e përftuara deri në këtë fazë po analizohen dhe kryqëzohen me njëra-tjetrën, me qëllim përcaktimin e shkakut të ardhjes së pasojës.
