TETOVË– Një sherr brenda çiftit dyshohet të jetë shkaku i vrasjes së 16-vjeçarit nga e dashura e tij 17 vjeçe. Ai u godit me mjet të mprehtë brenda makinës. Pas vrasjes ajo e hodhi trupin e tij në lumin Shkumbin. Ngjarja në fillim u raportua si vetëvrasje por pas kqyerjes së trupit u panë shenjat e goditjeve që rezultuan fatale për të miturin.
E mitura ndodhet në paraburgim dhe sipas policisë së Tetovës ka pranuar vrasjen e të dashurit të saj. Ndërkohë nxënësit dhe mësuesit e shkollës Ekonomike ku studionte viktima i kanë dhënë lamtumirën e fundit 16-vjeçarit.
Avokati mbrojtës i të miturës, Ibrahim Bajrami tha se vajza po mbahet nën mbikqyrje të specializuar psikiatrike me qëllim të konstatimit të gjendjes së saj mendore. Më tej, Bajrami tha se procedura ende është në fazë hetimore.
“Për momentin mund të them se bëhet fjalë për person të mitur të gjinisë femërore, nën 18-vjeç. Çështja është në procedurë hetimore dhe si e tillë për shkak të zbardhjes sa më korrekte të rastit është mirë që në këtë fazë t’i lëmë organet të bëjnë detyrën. Personi që unë e kam marrë ta përfaqësoj, nga sonte do të jetë nën mbikqyrje të stafit profesional mjekësor, për t’u vërtetuar gjendja e saj psiko-fizike. Kjo është shumë e rëndësishme për t’u vërtetuar gjendja faktike në lidhje me rastin shumë tragjik”, deklaroi avokati Bajrami.
Ngjarja e rëndë është regjistruar ditën e djeshme. Fillimisht u raportua si vetëvrasje pasi u gjet makina në ujërat e lumit Shkumbi. Por pas ekspertizës mjeko-ligjore dhe kqyerjes së trupit të të riut u konstatua se ai ka humbur jetën si pasojë e humbjes së gjakut për shkak të plagëve të marra.
