DURRËS– Jurgen Vrioni e Arben Haxhiu, janë dy të rinjtë që kanë mbetur të plagosur me armë zjarri pak pas mesnatës në lagjen numër 10 të Durrësit.
Raportohet se në ngjarje është i përfshirë dhe Mario Vrioni! Autor i dyshuar i ngjarjes është Klajdi Mansaku. Gjithçka nisi pas një konflikti në rrjetin social Tik Tok, të plagosurit dhe autorët lanë takim për tu sqaruar por ajo që ndodhi më pas çoi në plagosjen e dy 21-vjeçarëve.
Sapo ka parë makinën me të xilën udhëtonin Vrioni dhe Haxhiu, 25-vjeçari Klajdi Mansaku ka hapur zjarr me pistoletë. Një plumb rikoshet ka prekur Jurgen Vrionin.
Ai u transportua në spital dhe ndodhet jashtë rrezikut për jetën. Policia ka shpallur në kërkim autorin e ngjarjes së rëndë Klajdi Mansaku.
NJOFTIMI I PLOTË I POLICISË:
Në orët e para të mëngjesit, rreth orës 01:15 minuta, në lagjen nr. 10, dyshohet se për shkak të një konflikti në rrjetin social TikTok, shtetasi K. M., 25 vjeç, ka qëlluar me armë zjarri, dhe si pasojë, janë dëmtuar lehtë shtetasit J. V., 21 vjeç, dhe A. H., 21 vjeç, të dy banues në lagjen nr. 12, Durrës. Nga veprimet e para hetimore rezulton se autori i dyshuar, shtetasi K. M., rreth orës 22.30, të mbrëmjes së djeshme ka debatuar në telefon me shtetasin M. V, (kushuri i shtetasit J. V.) dhe i ka lënë takim për tu sqaruar në afërsi të banesës së shtetasit M. V.
Shtetasi M. V., pasi ka marrë kushëririn e tij shtetasin J. V., dhe shtetasin A. H., (shok i përbashkët i tyre) ka shkuar në vendin ku e kishin lënë për tu sqaruar me shtetasin K. M. Ky i fundit sapo ka parë që këta shtetas janë afruar, ka qëlluar me armë zjarri në drejtim të makinës së shtetasit M. V., dhe është larguar menjëherë. Si pasojë, (dyshohet nga plumb rikoshet) janë lënduar lehtë shtetasi J. V., i cili pas ndihmës mjekësore ka dalë nga spitali, dhe shtetasi A. H., që aktualisht po merr ndihmë mjekësore dhe është jashtë rrezikut për jetën.
Grupi hetimor në bashkëpunim me Prokurorinë po vijon punën për dokumentimin e plotë të rrethanave të ngjarjes.
Ndërkohë nga shërbimet e Policisë janë ngritur pika kontrolli, në akset rrugore, janë njoftuar pikat e kalimit kufitar, dhe po ushtrohen kontrolle në banesa e ambiente ku dyshohet se mund te fshihet 25 vjeçari me qëllim kapjen e tij.
