MILOT– Gjendet trupi i pajetë i Valentin Nikollit, 22-vjeçarit nga Fushë Miloti, i cili u mbyt një ditë më parë në ujërat e lumit Mat ku ra aksidentalisht pasi ishte duke peshkuar. I riu ishte bashkë me dy shokët e tij në momentin që u mor nga rrjedha e fortë duke mos dalë më prej saj. Trupi i pajetë i Nikollit u nxorr nga pëlumbarët e RENEA-s, të cilët prej orësh kërkonin në ujë.
NJOFTIMI I POLICISË:
Lezhë. Skuadra e polumbarëve e Repartit Special RENEA, prej mbrëmjes së djeshme u përfshi në operacionin e kërkimit për gjetjen e 22-vjeçarit, i cili dyshohet se ra aksidentalisht në lumin Mat dhe për pasojë e mori rrjedha e lumit. Pas kërkimeve prej disa orësh në lumin Mat, nga shërbimet e Policisë dhe skuadra e polumbarëve e Repartit Special RENEA, u bë e mundur gjetja e trupit të pajetë të shtetasit V. N., 22 vjeç, banues në Milot, i cili ditën e djeshme dyshohet se ka rënë aksidentalisht në lumë, gjatë kohës që po peshkonte me shokët e tij. Grupi hetimor, në drejtimin e Prokurorisë, po punon për zbardhjen e plotë të rrethanave të ngjarjes.
