TIRANË– Gjykata e Posaçme e Shkallës së Parë për Korrupsionin dhe Krimin e Organizuar ka dhënë vendimin sot për gjyqin mes Evis Kushit dhe Albana Vokshit. GJKKO ka shpallur ta pafajshme deputeten Vokshi pasi u padit nga Ministrja Kushi për shpifje. Pas dhënies së vendimit, në një dalje para mediave, deputetja e PD kërkoi sërish dorëheqjen e Kushit duke e cilësuar atë si shkaktare të degradimit të arsimit. Po ashtu bëri thirrje që prindërit t’i bashkohen në përpjekjet e tyre për të shpëtuar të ardhmen e fëmijëve.
“Gjykata më dha të drejtë. Më shpalli të pafajshme duke rrëzuar padinë e Evis Kushit. Ky është sinjali i parë i mirë që vjen nga drejtësia. Shpresoj të mos jetë rast i izoluar. Drejtësia të përballet me shantazhet dhe dhunën që ushtron pushteti. Shkatërrimi i arsimit është një nga krimet më të mëdha të qeverisë Rama. Shumë prindër nuk besojnë më te arsimi shqiptar. Përgjejgës për këtë janë Edi Rama dhe Evis Kushi. Meqënëse nuk pres vendimmarrje nga Rama, sot i kërkoj Evis Kushit të japë dorëheqjen sot pasi është shkaktare e degradimit të arsimit. Duhet të shpëtojmë fëmijët e të ardhmen. Shkatërrimi i arsimit ka pasoja për të ardhmen e shoqërisë shqiptare ndaj duhet të bashkohemi për të ndalur këtë qeveri anti-shqiptare. Ftoj çdo prind që të bashkohet me përpjekjet tona për demokraci”, tha Vokshi.
Kushi ka ngritur padi ndaj Vokshit, pasi kjo e fundit ka denoncuar se pyetjet e testit të vlerësimit për mësuesit parauniversitarë kanë dalë një ditë para provimit për të “favorizuarit”. Demokratja ka nxjerrë një mesazh të marrë nga një mësuese në Elbasan, e cila ka dërguar me dokumenta pyetjet e provimit që i kishte shpërndarë drejtori i shkollës së saj një ditë para provimit që do të zhvillohej në Tiranë. Sipas mësueses, të gjitha ishte nxjerrë me porosi të ministres së Arsimit, Evis Kushi, për personat e saj të afërm.
