TIRANË– Autoritetei i Mediave Audiovizive ka reaguar këtë të enjte pas publikimit të pamjeve të rënda ku gazetarët dhe ekipi i operatorëve të emisionit ‘Fiks Fare” u morën peng, u qëlluan me armë dhe u dhunuan në momentin që ishin duke xhiruar pamjet nga gërryerja e paligjshme që po ndodhte në lumin Zezë të Niklës. AMA dënon ushtrimin e dhunës fizike dhe verbale të reporteres dhe kameramanit dhe bën thirrje për hetime të thelluara në lidhje me këtë ngjarje.
NJOFTIMI I AMA-s:
Pamjet e transmetuara të mërkurën në mbrëmje (08.02.2023), në emisionin investigativ “Fiks Fare” në televizionin Top Channel, janë shumë shqetësuese për lirinë e ushtrimit të profesionit nga një grup xhirimi që hetonte një rast paligjshmërie në afërsi të Niklës në qarkun e Durrësit.
Autoriteti i Mediave Audiovizive, AMA dënon ashpër ushtrimin e dhunës verbale dhe fizike që shkoi deri dhe përdorimin e armës së zjarrit për frikësimin e reporteres dhe kameramanit, si akte të papranueshme dhe goditëse për lirinë e fjalës. Aq më tepër që ngjarja ndodhi në një pronë publike, buzë lumit, ku një grup personash kryenin aktivitet të paligjshëm me pretendimin se ishin në “pronën” e tyre.
