TIRANË– Kreu i Partisë Demokratike Sali Berisha ka marrë masa pas sulmit në protestën e 6 dhjetorit të vitit të shkuar. Bëhet me dije se në protestën e 11 shkurtit, Berisha do të jetë i rrethuar nga një perimetër sigurie. Në planin e masave të hartuara nga grupi i sigurisë së sëlisë blu është parashikuar dhe një perimetër sigurie me shërbime.
Këta të fundit do të jenë të ‘kamufluar’ si protestues, por funksion do të kenë ruajtjen e kryedemokratit dhe të të gjithë personaliteteve të Opozitës.
Ndërkohë kujtojmë se më 6 dhjetor Berisha u qëllua me grusht nga 31-vjeçari Gerti Shehu, teksa marshonte në bulevardin “Dëshmorët e Kombit” për të marrë pjesë në protestë. Shehu goditi me grusht në fytyrë Berishën duke e gjakosur.
Për këtë ngjarje Berisha akuzoi kryeministrin Edi Rama, ndërsa familjarët e 31-vjeçarit deklaruan se i riu kishte probleme të shëndetit mendor.
