Me shumë mundësi ke parë përreth lajmet se mund të ketë një çështje gjyqësore mes serialit “South Park” dhe çiftit mbretëror, Meghan dhe Harry. Zërat nisën pas episdodit më të ri të serialit.
I titulluar “Worldwide Privacy Tour”, seriali paraqiste “Princin e Kanadasë dhe të shoqen”, (pra, Meghan dhe Harry) me pankarta që shkruanin “Duam privatësinë tonë dhe “Mjaft na patë”, ndërkohë që princi promovonte librin e tij “Waaagh” (“Spare”).
Në serial, ata etiketohen si “Princi i Kanadasë dhe e shoqja”, ndërsa specifikisht Meghan si “vajza shoqëruese, aktorja, influencerja, viktima”.
Pasi ky episod u publikua, shumë media aluduan dhe raportuan lajme të rreme se duka dhe dukesha e Sussex po konsideronin hapjen e një çështjeje gjyqësore, por një zëdhënës i tyre tha për “People” se: “Sinqerisht, e gjitha është pa sens. Pa asnjë bazë. Raportime të mërzitshme”.
Zëdhënësi nuk tregoi nëse duka dhe dukesha ishin të mërzitur apo të nevrikosur me serinë, ama theksoi se “Meghan dhe Harry kanë zgjedhur të tregojnë historinë e tyre dhe sërish media ka krijuar një narrativë të pavërtetë, e cila depërton në opinionin publik. Faktet janë përpara tyre”, shtoi personi.
Pra, nuk ka një çështje gjyqësore, megjithëse ironia është vërtet therëse./Anabel
