KRUJË– Detaje të reja janë zbardhur në lidhje me atentatin mafioz në Larushk të Krujës ku mbeti i vrarë kunati i Gentian Bejtjes, Ramazan Sino, 29 vjeç dhe u plagosën dy djemtë e tij Alvi Bejtja, 13 vjeç dhe tjetri vetëm 10 vjeç. Mësohet se Sino punonte si shofer në Prokurorinë e Apleit në Tiranës. Ende nuk dihet se për cilin prokuror apo zyrtar punonte i ndjeri. Ai ishte viktimë e një atentati që nuk ishte për të pasi “shënjestra” ishte Gentian Bejtja, i cili nuk ishte në makinë në momentin që u hap zjarr.
Mësohet se atyre u është bërë pritë sapo kanë hyrë në oborrin e banesës. Autorët kanë hapur zjarr me breshëri duke lënë të vdekur në vend Sinon dhe plagosur dy djemtë e mitur të Bejtjes, të cilët ndodhen në spital nën kujdesin e mjekëve, njëri prej tyre Alvi Bejtja, 13 vjeç në gjendje të rëndë. Zbardhja e ngjarjes mbetet e vështirë pasi zona nuk ka kamera sigurie pasi ato u hoqën nga Policia në kuadër të operacionit “Fijet”.
Ndërkohë makina e përdorur nga autorët tip “Volsvagen” është gjetur e djegur afër Tapizës. Brenda saj ishin dhe tre kallashnikovët e përdorur. Dhe ata ashtu si mjeti janë djegur plotësisht duke fshirë kështu çdo gjurmë që çon drejt tyre. Policia ka krehur zonën përreth por ende nuk ka asnjë provë që çon drejt atentatorëve apo organizatorët.
