ELBASAN– Detaje të reja janë zbardhur në lidhje me megaoperacionin e Policisë në Elbasan të koduar “Rrjeti” ku 45 persona ranë në pranga dhe shtatë të tjerë u shpallën në kërkim nga Policia. Mësohet se grupi që shpërndante lëndën narkotike të llojeve kokainë, heroinë, ekstazi dhe kanabis e përpunonin dhe e përgatisnin në doza të vogla, gati për shitje. “Gropën” ua ka bërë një agjent i infiltruar i Policisë, që mbante emrin e koduar “K” i cili ka marrë disa herë doza koaine tek Igli Merko, Denis Darzeza, Ahmet Kushi, Gavrosh Berati, Florenc Demiri, Arsen Vishkulli, Erist Skilja dhe Emirjan Dinja.
Biseda:
Gjeli: Hë ka dal e mirë?
Agjenti “K”: E mir ishte vlla.
Gjeli: Unë e mbaj të zgjedhme se e pi vet nai viz ene e maj të zgjedhme nuk mar kot.
Agjenti “K” :Jo ishte i mirë me verte ky.
Gjeli: Në përgjithsi e zi a kupto.
Agjenti “K”: Dilte e fuqishme fare.
Gjeli: Na e la hajt të rujt zoti.
Agjenti “K“: Hajt.
Duke iu referuar dosjes hetimore Report Tv shkruan se agjenti i autorizuar ndaloi para një bar-kafe rreth orës 19:30 në rrugën ‘Belul Berisha’, ku u afrua një automjet tip Audi që drejtohej nga Igli Merko. Pas bisedës u futën në një rrugicë ku agjenti e priti dhe për 3 minuta, Igli Merko doli nga dersa e një banese dhe i dha diçka në dorë. Agjenti u largua ndërsa Igli Merko u fut në automjet. Më pas më 31 maj, agjenti i autorizuar u takua me një tjetër person të përfshirë në këtë veprimtari, Denis Darzeza. Të dy u takuan në orën 21:30 në afërsi të kryqëzimit të rrugëve ‘Jordan Misja’ dhe pasi biseduan pak, Denisi i dha në dorë diçka agjentit të autorizuar dhe u largua. Agjenti e dorëzoi në polici dhe rezultoi të ishte shishe plastike uji me mbishkrimin ‘Spring’ e mbushur me sasi të lëngshme e cila dyshohet të jetë metadon.
Ndërsa Ahmet Kushi, shkruan Report Tv merrej me shitjen e heroinës. Agjenti i autorizuar u takua me të në orën 11:40 të datës 2 qershor pranë pallatit që njihet me emrin ‘pallati kinez’, zonë ku vepronte Kushi për të marrë sasinë e heroinës. Gavrosh Berati kryente veprimtarinë kriminale nga banesa e tij dhe gjatë gjithë kohës ka biseduar me agjentin e autorizuar nga brenda shtëpisë. Takimi i tyre është bërë në orën 17:30 në shesh parkimin e pallatit ku mori një qese me kokainë. Me Emiljan Dinjën, agjenti është takuar 2 herë më 31 maj. Herën e dytë, Dinja i dha kokainë që e kishte mbështjellë me letër si ajo e paketave të cigareve. Edhe me Florenc Demirin u takua me 31 maj pranë një bar kafe rreth orës 13:00. Demiri i dha diçka agjentit që e kishte fshehur te qepeni i ngritur i lokalit. BNrenda ishin 2 qese me kokainë që ishin mbyullur me përdredhje dhe djegie.
