Presidentja e Komisionit Evropian, Ursula von der Leyen, ka mbërritur në Tiranë për të marrë pjesë në Samitin e 6-të të Komunitetit Politik Evropian. Ajo e ka cilësuar këtë ngjarje si një simbol të fuqishëm për Shqipërinë, duke vënë në dukje rëndësinë që ka Ballkani Perëndimor për të ardhmen e Evropës.
Ky është takimi i parë i këtij lloji që zhvillohet në rajon, dhe Shqipëria është kthyer për një ditë në qendër të vëmendjes evropiane. Samiti zhvillohet në sheshin “Skënderbej” dhe sjell në Tiranë 47 liderë nga i gjithë kontinenti. Ngjarja është organizuar nga Presidenti i Këshillit Evropian, António Costa, në bashkëpunim me Kryeministrin Edi Rama.
Gjatë ditës, liderët diskutojnë për çështje të rëndësishme si siguria, bashkëpunimi rajonal dhe e ardhmja e Evropës. Pasdite janë parashikuar takime bilaterale ndërmjet liderëve, ndërsa në fund të ditës do të mbahet një konferencë e përbashkët për shtyp mes Kryeministrit Rama dhe homologut të tij danez.
Ky samit konsiderohet një moment historik për Shqipërinë dhe një hap tjetër përpara në rrugën drejt integrimit evropian.
