TIRANË– Inspektorati Shtetëror i Mbikqyrjes së Tregut ka reaguar pasditën e kësaj të shtune në lidhje me ngjarjen e rëndë të regjistruar në orët e para të mëngjesit të sotëm në “Orange Club” në Sarandë ku një 17-vjeçar humbi tragjikisht jetën. Sipas ISHMT pas verifikime në terren është konstatuar se pajisja e përshtatur për transportin e mallrave nuk ishte ashensor dhe bazuar në ligj ata nuk kanë kompetencë që të kryejnë verifikime.
Antonio Halilaj, 17 vjeç, i cili punonte si kamarier në një nga lokalet më të njohura të Sarandës humbi tragjikisht jetën pasi kablloja e pajisjes së përshtatur si ashensor u shkëput. Dëmtimet e shumta bënë që adoleshenti të ndërronte jetë në vendin e ngjarjes. Në lidhje me aksidentin Policia ka arrestuar përgjegjësin e mirëmbajtjes së ashensorit si dhe ka shpallur në kërkim pronarin e “Orange Club” Spiro Iljadhi.
REAGIMI:
Sqarim Në lidhje me aksidentin e ndodhur mbrëmjen e djeshme datë 26.08.2023 në subjektin “Orange”, Sarandë, ku një i ri 17-vjeçar humbi jetën, Inspektorati Shtetëror i Mbikqyrjes së Tregut pasi ka kryer verifikimet në terren, informon se: Pajisja e përshtatur për transport mallrash nga subjekti, e cila ka pësuar defekt nuk është ashensor. Si rrjedhojë, ISHMT nuk ka kryer inspektime apo kontrolle pranë këtij subjekti, bazuar kjo në detyrimin e përputhshmërisë së instalimit të vendosur në shërbim nga personi përgjegjës, pasi nuk është brenda kompetencës ligjore të tij. ISHMT shpreh keqardhje për aksidentin tragjik dhe i shpreh ngushëllime të sinqerta familjes së të riut.
